«Такіх праколаў у нас быць не мусіць». Кіраўнік «ByPol» перапрасіў за «ціхара» ў Вільні
Кіраўнік «ByPol» Аляксандр Азараў у каментары «Белсату» назваў недапушчальнай памылку з «ціхаром» у Вільні. «Натуральна, будзем асцярожней паводзіць сябе. Такіх праколаў у нас быць не мусіць», – заявіў Азараў.
Кіраўнік «ByPol», прадстаўнік Аб’яднанага пераходнага кабінету ў справе аднаўлення правапарадку Аляксандр Азараў пракаментаваў «Белсату» памылку з мужчынам, якога зблыталі з ціхаром. Азараў патлумачыў, што літоўскі журналіст вельмі падобны на колішняга міліцыянта з Менскай вобласці:
«Ён вельмі падобны, і нейрасеткі, як цяпер модна казаць, паказалі амаль стоадсоткавае супадзенне. Але ж бываюць амаль двайнікі, супадзенні могуць быць, гэта вялікая рэдкасць, але бывае».
Суразмоўца «Белсату» сцвярджае, што выяву меркаванага ціхара некалькі разоў праверылі праз базу колішніх сілавікоў.
«Нам даслалі відэа, яго знялі на відэа. Мы гэтае відэа «прагналі» праз нашую базу, і яна распазнала яго. Розныя асобы правяралі некалькі разоў на розных камп’ютарах – і ўва ўсіх было супадзенне, што гэта ён. Дзіўна, натуральна, што не ён», – сказаў Азараў.
Ён запэўніў, што «ByPol» зробіць работу над памылкамі:
«Натуральна, будзем асцярожней паводзіць сябе. Такіх праколаў у нас быць не мусіць».
Азараў папрасіў прабачэння ў літоўскага журналіста Даруса Матайціса, якога «ByPol» раней ідэнтыфікаваў як колішняга супрацоўніка аператыўна-дзяжурнай службы ДАІ Менскай вобласці Андрэя Трапашку.
Мужчына дзеяў гэтак жа, як сілавікі ў цывільным на апазіцыйных мітынгах у Беларусі: стоячы ўбаку, ён здымаў на камеру ўдзельнікаў акцыі на Дзень Волі ў Вільні. Таму яго западозрылі ў супрацы з беларускімі спецслужбамі.
Матайціс здымае для фотаагенцтва «Scanpix». Журналіст распавёў, што падчас працы на віленскай акцыі ў яго ніхто не пытаўся, хто ён і адкуль. «Таксама побач стаяў паліцэйскі патруль, яны маглі адразу падаць заяву, я б паказаў усе дакументы», – сказаў Матайціс.
Сяргей Крот belsat.eu
