У выніку расейскага ўдару па Крывым Рогу ў Днепрапятроўскай вобласці Украіны адзін чалавек загінуў і больш за 70 чалавек атрымалі раненні, паведаміла прэс-служба ДСНС.
Расейскія войскі абстралялі цэнтр Крывога Рога раніцай 8 верасня. Аскепкамі і выбухной хваляй пашкодзіла жылыя дамы, а на плошчы 200 квадратных метраў загарэліся гаражы.
Па стане на 18:30 у выніку абстрэлу загінуў 1 чалавек і 73 чалавекі атрымалі раненні, 35 у шпіталі. Стан двух мужчын ацэньваецца як цяжкі. Сярод траўмаваных – дзевяць супрацоўнікаў паліцыі.
Нацыянальная паліцыя Украіны апублікавала відэа першых хвілінаў пасля ракетнага ўдару па цэнтры Крывога Рога. Кадры знятыя нагруднай камерай аднаго з паліцыянтаў.
Увага, відэа ўтрымлівае жорсткія кадры!
Таксама ў ноч на 8 верасня Расея атакавала Украіну ракетамі і дронамі Shahed – выбухі прагрымелі каля Сумаў і Адэсы. У Сумах ужо завяршылі разбор завалаў пасля ракетнага абстрэлу прыватнага сектара, з-пад абломкаў дасталі двух чалавек. Усяго пацярпелых чацвёра.
У Херсонскай вобласці ад выбуху расейскай авіябомбы загінулі трое мірных жыхароў: двое жанчын і мужчына. Пацярпелі чацвёра мясцовых жыхароў.
Алена Рувіна belsat.eu