88-гадовага Фелісьена Кабугу, якога падазраюць у генацыдзе ў Руандзе, вызвалілі ад адказнасці. Суд ААН па ваенных злачынствах пастанавіў, што ён псіхічна непрыдатны, піша «CNN».
Фелісьен Кабуга 26 гадоў хаваўся ад правасуддзя. Ён з’яўляецца апошнім уцекачом, якога абвінавацілі ў прапагандзе нянавісці і ўзбраенні апалчэнцаў падчас генацыду ў Руандзе ў 1994 годзе. Кабуга быў кіраўніком «Радыё тысячы пагоркаў», зʼяўляўся адным з самых багатых і ўплывовых асобаў Руанды сярод эліты хуту. У выніку прапаганды нянавісці ў Руандзе загінулі ад 500 тысяч да 1,1 мільёна асобаў.
Больш за два дзесяцігоддзі ён хаваўся ў Парыжы, схапілі яго ў 2020 годзе.
Падчас першага судовага паседжання ў лістападзе 2020 году ён не прызнаў сябе вінаватым.
Цяпер жа суд у Гаазе палічыў, што Кабуга больш не здольны ўдзельнічаць у судовым працэсе праз псіхічнае захворванне. Тым не менш суд працягнецца, суддзі вызначаць ступень вінаватасці, але прысуд не будзе агучаным.
Алена Аляксандрава belsat.eu
