«Белсат» падводзіць вынікі 255-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 5 лістапада чытайце ў нашым аглядзе.
На ўчастку фронту ў паўночна-ўсходняй частцы Харкаўскай вобласці цягам содняў лінія фронту не змянялася. Тэлеграм-канал «Рыбарь» звязвае адсутнасць атак з украінскага бок з наступствамі папярэдняга няўдалага наступу на Ягаднае, пасля якога ЗСУ вымушаныя аднаўляць сілы і праводзіць ратацыю.
У суседняй Луганскай вобласці Збройныя сілы Украіны, паводле Міністэрства абароны РФ, безвынікова атакавалі пазіцыі праціўніка ў ваколіцах населеных пунктаў Куземаўка, Плашчанка і Крэмінная. Пры гэтым праект Deepstatemap фіксуе невялікае прасоўванне ЗСУ у бок Плашчанкі за гэтыя содні. «Рыбарь» піша пра дзейнасць украінскай дыверсійна-выведнай групы на кірунку Каламыйчыха – Куземаўка.
У сваю чаргу Генеральны штаб ЗСУ паведамляе пра адбіццё расейскай атакі на Белагораўку. Deepstatemap адзначае ўваходжанне войскаў РФ у сяло Кавалёўка Сватаўскага раёну. Ваенкор Сямён Пегаў піша пра ўдары расейскай артылерыі па ўкраінскіх пазіцыях каля Бераставога, Стэльмахоўкі, Мясажараўкі і Ямпалаўкі.
На тэрыторыі Данецкай вобласці Збройныя сілы Украіны адбілі атакі расейцаў каля Спірнага, Бахмуту, Бахмуцкага, Іванграду, Кляшчэеўкі, Азаранаўкі, Маёрску, Камянкі, Первамайскага, Невельскага, Мар’інкі, Новаміхайлаўкі і Паўлаўкі. Сямён Пегаў піша таксама пра атакі на Вопытнае і Верхнякаменскае. Між тым «Рыбарь» паведамляе пра спробы ЗСУ контратакаваць у ваколіцах Вопытнага і Курдзюмаўкі. Пры гэтым ніводная з крыніцаў не фіксуе зменаў у лініі фронту ў Данецкай вобласці
У Запарожскай вобласці сітуацыя па-ранейшаму застаецца адносна спакойнай: бакі канфлікту не праводзяць наземных аперацыяў, пры гэтым абменьваюцца артылерыйскімі ўдарамі.
Па лініі фронту ў Херсонскай вобласці Збройныя сілы Украіны атакавалі ў бок населеных пунктаў Саблукаўка і Суханава, намагаючыся знайсці слабыя месцы ў абароне расейцаў. Пегаў піша пра абстрэлы ўкраінскімі войскамі Херсону, Радзенску і Чарнабаеўкі. Пры гэтым аналітыкі амерыканскага Інстытуту вывучэння вайны мяркуюць, што расейскія сілы цяпер ствараюць умовы для кантраляванага адыходу з правага берагу Дняпра, імкнучыся пазбегнуць хаатычнага адступлення сваіх войскаў.
Агулам за содні ЗСУ знішчылі каля 600 расейцаў, пасля чаго беззваротныя страты РФ з моманту пачатку поўнамаштабнай вайны дасягнулі 75 440 чалавек.
Ва ўмовах актыўных баявых дзеянняў журналісты не маюць магчымасці аператыўна правяраць паведамленні ўдзельнікаў вайны.
ВК belsat.eu
