Дэпартамент міграцыі МУС Літвы прызнаў, што 910 грамадзянаў Беларусі ўяўляюць пагрозу нацыянальнай бяспецы краіны. Такія высновы былі зробленыя на падставе аналізу анкетаў, якія беларусам і расейцам цяпер трэба запаўняць пры падачы на дазвол на жыхарства ці нацыянальную візу.
337 беларусам адмовілі ў выдачы часовага віду на жыхарства. Яшчэ 121 беларус атрымаў адмову ў працягу ВНЖ. У 205 выпадках Літва анулявала ВНЖ, раней выдадзеныя грамадзянам Беларусі.
Дзве асобы атрымалі адмову ў пастаянным дазволе на жыхарства, яшчэ ў чатырох пастаянны дазвол адклікалі.
241 беларусу Літва адмовіла ў выдачы нацыянальнай візы.
Адначасова пагрозаю для нацыянальнай бяспекі былі прызнаныя 254 расейцы. У выдачы часовага дазволу на жыхарства адмовілі 43 грамадзянам Расеі, 46 асобам не працягнулі ВНЖ. 59 расейцам анулявалі раней выдадзены часовы дазвол на жыхарства, 52 расейцам – сталы. Нацыянальную візу не выдалі 52 грамадзянам Расеі.
Усім вышэйзгаданым 1164 грамадзянам Беларусі і Расеі быў забаронены ўезд у Літву як асобам, якія ўяўляюць пагрозу нацыянальнай бяспецы краіны.
Напрыканцы лістапада 2022 года для грамадзянаў Беларусі і Расеі ў Літве была ўведзеная адмысловая анкета, на падставе адказаў у якой і былі зробленыя высновы аб пагрозе нацыянальнай бяспецы. Запаўняць анкету абавязаныя ўсе грамадзяне Расеі і Беларусі, якія дасягнулі ўзросту 18 гадоў, пры падачы дакументаў на выдачу ці працяг дазволу на жыхарства, а таксама на нацыянальную візу.
Сярод іншага, у анкеце трэба было падаць інфармацыю пра сваю адукацыю, папярэднія месцы працы, службу ва ўзброеных сілах, бізнес-сувязі, кантакты з дзяржаўнымі ўстановамі краінаў NATO ці тых, якія не ўваходзяць у ЕЗ, а таксама выказаць сваё стаўленне да расейскай агрэсіі ва Украіне.
Марыя Міхалевіч belsat.eu
