Беларусы, якія ваююць у Збройных сілах Украіны, прыдумалі новы спосаб збіраць грошы на свае патрэбы: полк Каліноўскага запусціў сваю лінію мерчу, ужо прадае майкі.
Выбар у краме пакуль невялікі, толькі пара колераў і пара малюнкаў (на адным – чалавек, падобны да загінулага байца Івана Брэста). Але асартымент абяцаюць пашыраць.
Дастаўку пакуль прапануюць па Украіне і Еўразвязе. Майка каштуе 1000 грыўняў (каля € 28), грошы пойдуць на патрэбы вайскоўцаў.
Забаўны факт: майкі на 95 % складаюцца з бавоўны, а ва Украіне слова «бавовна» стала мэмам, які значыць удары па расейскіх вайсковых аб’ектах. Справа ў тым, што расейскія дзяржаўныя і праўладныя медыі пазбягаюць слова «взрыв» і ўжываюць замест яго слова «хлoпóк» (і прыдумляюць неверагодныя апраўданні ваенным стратам: напрыклад, флагман Чарнаморскага флоту патануў, бо хтосьці няўдала пакурыў). Украінцы ж іх дражняць і пішуць пра «хлóпок» – «бавовну» на расейскіх вайсковых аб’ектах. Міністэрства абароны Украіны нават зрабіла сваім нефармальным талісманам пухнатую істотку «Баваўнятка».
Цяпер можна купіць бавоўну ад беларускіх ваяроў ва Украіне. Але можна дапамагчы і наўпрост грашыма: рэквізіты тут. Падтрымаць можна і іншых беларускіх ваяроў ва Украіне: напрыклад, грошы збірае полк «Пагоня» і фонд BYSOL.
Алесь Наваборскі belsat.eu