5 студзеня быў затрыманы 40-гадовы жыхар Менску, якога падазраюць у распаўсюдзе парнаграфічных матэрыялаў з удзелам дзяцей.
Паводле следства, мужчына пісаў сцэнары парнаграфічных фільмаў, у якіх здымаліся няпоўнагадовыя. Праваахоўнікі высветлілі, што ў адным з фільмаў брала ўдзел 5-гадовае дзіця. Сцэнары менчука рэалізоўваліся жыхарамі Украіны. Зняты матэрыял выкладваўся на платных порнасайтах.
Інфармацыю аб менскім сцэнарысце дзіцячай парнаграфіі беларускія праваахоўнікі атрымалі ад Дэпартаменту кіберпаліцыі Нацыянальнай паліцыі Украіны.
Летась МУС Беларусі апублікаваў справаздачу, у якой гаворыцца, што ў апошнія гады колькасць злачынстваў супраць палавой недатыкальнасці і свабоды падлеткаў павялічылася ў 15 разоў.
У 2017 годзе дзеці сталі ахвярамі гвалту 581 раз, што на 84,4 % вышэй паказнікаў 2016 года. Пры гэтым 361 факт педафіліі адносіцца да катэгорыі цяжкіх і асабліва цяжкіх злачынстваў.
ЮВ, belsat.eu