Кандыдат у дэпутаты ад Беларускай хрысціянскай дэмакратыі Зміцер Казакевіч расказаў падрабязнасці затрымання яго і іншых актывістаў падчас Курапацкай варты 3 лістапада. Пра гэта паведамляе сайт БХД.
Паводле Казакевіча, напярэдадні ён паспрабаваў прайсці на тэрыторыю рэстарацыі «Паедзем, паядзім», каб раздаваць улёткі і размаўляць з выбарнікамі. Ахоўнікі не давалі зайсці актывістам, спрабавалі выпіхнуць, зламалі вуду са сцягам. Пасля гэтага з’явіліся два міліцыянты ды прыехаў шэры мікрааўтобус без апазнавальных знакаў.
«Выбеглі адтуль людзі без формы. Кінулі нас усіх у гэты бусік. І ўсю дарогу ад гэтага рэстарана і да Бараўлянскага РАУС білі нагамі, скакалі па нас. На мяне зверху кінулі яшчэ Віталю (Трыгубава. – Рэд. Belsat.eu), і нас дваіх нагамі мясілі. Дзяніса Урбановіча, Іларыёна Трусава – усіх адхадзілі. Мы калі прыехалі, я думаў, што Максім Урбановіч зусім без прытомнасці», – расказаў Казакевіч.
На затрыманых склалі адміністрацыйныя пратаколы паводле артыкулаў 17.1 (дробнае хуліганства) і 23.4 (непадпарадкаванне міліцыі) КаАП. Зміцер Казакевіч адмовіўся прызнаваць віну, бо, адзначыў ён, працаўнікі міліцыі нічога не тлумачылі актывістам, а «адразу без нічога кінулі ў бусік».
Выпусцілі яго толькі дзякуючы наяўнасці пасведчання кандыдата ў дэпутаты. Дзяніса Урбановіча пасля збіцця даставілі ў больніцу, а няпоўнагадовага Іларыёна Трусава забралі бацькі. Астатніх пакінулі ў РАУС, расказаў актывіст.
«Усё баліць»
У каментары «Белсату» Зміцер Казакевіч заявіў, што адчувае сябе не вельмі добра.
«Пасля ўчорашняга ўсё баліць», – адзначыў ён.
Последствия вчерашнего избиения 'тихарями'. Ждем сегодня судов над ребятами. На меня составили протоколы по 17.1 мелкое…
Opublikowany przez Зьміцер Казакевіч Niedziela, 3 listopada 2019
Паводле яго, вінаватых у збіцці «трэба неяк караць і прыцягваць да адказнасці».
«Алё ўсё-такі хацелася б сёння пабачыць на волі сваіх сяброў, якія зараз за кратамі сядзяць, і ўжо разам вырашаць, якім менавіта чынам прыцягваць і караць тых, хто рабіў», – дадаў кандыдат у дэпутаты.
Зміцер Казакевіч мяркуе, што затрыманых будуць судзіць сёння пасля 14:00 у судзе Менскага раёну. Пра час і месца свайго суду ён не ведае, бо яму сказалі толькі «чакаць паведамлення».
Што адбылося?
3 лістапада кандыдат у дэпутаты і адзін з актывістаў абароны Курапатаў Зміцер Казакевіч паспрабаваў прайсці на тэрыторыю рэстарацыі «Паедзем паядзім», але ахова іх не прапусціла. Распачалася штурханіна. У выніку міліцыянты затрымалі шасцёх чалавек з Курапацкае варты і адвезлі іх у Бараўлянскі аддзел міліцыі.
Апроч Змітра Казакевіча былі затрыманыя старшыня Маладога фронту Дзяніс Урбановіч, брат апошняга Максім, а таксама актывісты Валер Рабцаў, Іларыён Трусаў і Віталь Трэгубаў.
МГ belsat.eu
