У сірыйскім Алепа пры абстрэле паўстанцамі палявога шпіталю загінула расейская медсястра, яшчэ два лекары з Расеі атрымалі раненні.
Пра гэта паведамляе ў панядзелак, 5 снежня, агенцтва AP, спасылаючыся на расейскага афіцэра. Ён распавёў карэспандэнту агенцтва ў Алепа, што гэта адбылося ў заходняй частцы гораду, які знаходзіцца пад кантролем ураду Сірыі.
Адзначаецца, што палявы шпіталь прыбыў з Расеі днём раней.
У Міністэрстве абароны Расеі пацвердзілі інфармацыю пра гібель расейскай медсястры і аб раненне двух лекараў. У Мінабароны таксама заявілі, што адказнасць за абстрэл ляжыць на тэрарыстах ды «іхных заступніках з ЗША, Вялікай Брытаніі і Францыі».
Наступ сірыйскай арміі на ўсходнюю частку Алепа працягваецца пры падтрымцы шыіцкіх аддзелаў, што фінансуюцца Іранам, а таксама расейскай авіяцыі. Расея, аднак, падкрэслівае, што яе авіяцыя не бамбуе самога Алепа. Паводле некаторых ацэнак, у кварталах, якія знаходзяцца пад кантролем паўстанцаў, застаюцца каля 250 тысяч чалавек.
Савет Бяспекі ААН у панядзелак, 5 снежня, разгледзіць праект рэзалюцыі, у якой утрымліваецца патрабаванне на тыдзень спыніць баявыя дзеянні ў Алепа. Над дакументам працавалі дэлегацыі Егіпту, Іспаніі і Новай Зеландыі. Першапачатковы праект рэзалюцыі прадугледжваў увядзенне дзесяцідзённага рэжыму спынення агню, аднак па выніках дыскусіяў працягласць перамірʼя была скарочаная.
МЯ, паводле naviny.by
