Грамадская кампанія «ProtestBY» прапаноўвае тым, хто супраць змены законаў адносна адтэрміновак ад войска, аб’яднацца «пад адзіным сімвалам і гэштэгам #учёбаважнее».
Цяпер кожны жадаючы можа атрымаць бясплатны значок для падтрымання руху за адмену закона аб адтэрміноўцы, паведамляюць арганізатары.
Каб атрымаць значкі, трэба прыйсці ў крамы «Symbal.by» або «МОЙ МОДНЫ КУТ» і сказаць касіру кодавую фразу «Вучоба важнейшая». Колькасць значкоў абмежаваная.
Тым, хто атрымае значок, прапануюць сфатаграфавацца з ім і апублікаваць фота старонках ProtestBY.
Нагадаем, што Палата прадстаўнікоў у другім чытанні зацвердзіла новае заканадаўства аб прызыве. Законапраект ухвалілі і ў Савеце Рэспублікі. Неўзабаве – пасля подпісу Лукашэнкі – адтэрмінаванні з прычыны вучобы можна будзе ўзяць толькі адзін раз. А ваенкамат зможа забараніць выезд за мяжу нават тым, хто не атрымае позву.
МГ belsat.eu
