«BYSOL» ужо выплаціў на падтрыманне палітвязняў 49 500 еўраў, сабраных падчас марафону салідарнасці
Фонд салідарнасці «BYSOL» выплаціў 49 500 еўраў на падтрыманне палітвязняў і іхных сем’яў са сродкаў, атрыманых у выніку марафону салідарнасці з палітвязнямі «Нам не ўсё адно!», які прайшоў 29 ліпеня. Усяго ў фонд «BYSOL» было размеркавана 100 тысяч еўраў з агульнай сумы сабраных сродкаў.
Сузаснавальнік арганізацыі Андрэй Стрыжак заявіў, што цяпер «BYSOL» задаволіў 99 заявак.
«З першага траншу ад марафону мы зможам аплаціць яшчэ 100 заявак, таму заклікаем падаваць заяўкі для атрымання дапамогі ў памеры 500 еўраў», – напісаў Стрыжак.
Аформіць заяўку на атрыманне дапамогі можна праз наступныя спасылкі: для сем’яў палітвязняў і для вызваленых палітвязняў.
На дапамогу могуць разлічваць тыя, хто яшчэ не атрымліваў дапамогі ад «BYSOL» у выглядзе разавай выплаты або персанальнага збору цягам 2022–2023 гадоў. Таксама грошы могуць атрымаць і тыя, хто раней атрымаў дапамогу ад «BYSOL» у межах кампаніяў дапамогі дзецям (збор на летні адпачынак, збор да школы, калядны збор).
Усяго падчас марафону было сабрана 545 740,22 еўра, з якіх «BYSOL» былі перададзеныя 100 тысячаў. Агулам васьмі ініцыятывам і арганізацыям перавялі 218 900 еўраў.
- Беларуская рада культуры – 9 500 еўраў.
- «Анархічны чорны крыж – Беларусь» – 13 500 еўраў.
- Фонд дапамогі беларусам у Літве «Razam» – 13 500 еўраў.
- Дабрачынная арганізацыя «Littouwin LIONS CLUB» – 13 500 еўраў.
- Праваабарончая ініцыятыва дапамогі палітзняволеным «Dissidentby» – 14 000 еўраў.
- Дабрачынны фонд «Страна для жизни» – 18 000 еўраў.
- Ініцыятыва «BY_help» – 36 900 еўраў.
- Фонд беларускай салідарнасці «BYSOL» – 100 000 еўраў.
Аднак на пачатку кастрычніка МУС і Следчы камітэт Беларусі паведамілі аб завядзенні крымінальнай справы паводле ч. 2 арт. 361-2 КК («Фінансаванне экстрэмісцкай дзейнасці») у дачыненні арганізатараў і ўдзельнікаў марафону. Тады ў МУС паведамлялі, што нібыта 60 чалавек зрабіліся фігурантамі крымінальнай справы за марафон салідарнасці з беларускімі палітвязнямі.
Алена Рувіна belsat.eu
