Ва Украіне працягвае расці колькасць ахвяраў падрыву Кахоўскай ГЭС, што адбыўся 6 чэрвеня. Супольная колькасць ахвяраў, пра якія паведамляюць украінскія і расейскія ўлады, дасягнула 67 асобаў. Тым часам украінскія ўлады ацанілі шкоду ад здарэння.
Як паведамляе 22 чэрвеня ТАСС са спасылкай на экстраныя службы на акупаваных Расеяй тэрыторыях, колькасць загінулых у Херсонскай вобласці пасля прарыву Кахоўскай ГЭС вырасла да 46.
Напярэдадні расейскае медыя пісала пра больш як 23 тыс. жылых дамоў, якія апынуліся ў зоне затаплення. Таксама паведамлялася, што 121 асоба шпіталізаваная, больш як 8 тыс. эвакуяваныя, больш як 2 тыс. выратаваныя. Апроч таго, затопленая тэрыторыя Ніжнедняпроўскага нацыянальнага парку і 12 могілак.
20 чэрвеня міністр унутраных справаў Украіны Ігар Клымэнка адзначаў, што колькасць загінулых у выніку падрыву Кахоўскай ГЭС вырасла да 21 асобы, з іх пяцёра загінулі ад прыцэльных стрэлаў акупантаў.
«Застаюцца падтопленымі 595 дамоў на Херсоншчыне. Праз дзеі ворага, на жаль, расце колькасць загінулых і параненых: цяпер 21 асоба загінуў, у тым ліку 5 – праз прыцэльныя стрэлы расейцаў, яшчэ 28 атрымалі раненні, з іх 16 – нашы ліквідатары», – напісаў ён.
Паводле яго, эпідэмічная сітуацыя стабільная і кантраляваная. Пашырэння інфекцыйных хваробаў не зафіксавана, але лоўля і спажыванне рыбы ў пацярпелых раёнах забароненыя.
Журналісты BBC вывучылі спадарожнікавыя здымкі і пераканаліся, што за два тыдні з моманту разбурэння плаціны Кахоўскае вадасховішча абмялела настолькі, што вада не дастае да ўваходу ў пракапаныя ад яго каналы, у тым ліку да Паўночна-Крымскага.
Да вайны вадой з гэтых каналаў арашаліся 5,8 тыс. км² палёў з абодвух берагоў Дняпра, і яны давалі каля 2 млн тон збожжа і сланечнікавага насення за год. Цяпер жа вада перастала паступаць у чатыры сістэмы арашальных каналаў.
Тым часам Украіна папярэдне ацаніла экалагічную шкоду ад падрыву ГЭС у 1,5 млрд долараў. Такую суму назваў прэм’ер-міністр краіны Дзяніс Шмыгаль на канферэнцыі ў справе аднаўлення Украіны ў Лондане. У суму залучылі меркаваную шкоду, нанесеную аграгаспадарцы, інфраструктуры, жытлу, а таксама выдаткі на аднаўленне самой станцыі.
Якуб Хруст belsat.eu