Экіпажы шматмэтавых знішчальнікаў Су-35С Усходняй ваеннай акругі, якія прыцягваюцца да праверкі сілаў рэагавання Саюзнай дзяржавы, пачалі пералёт на тэрыторыю Рэспублікі Беларусь, паведамляецца на сайце Мінабароны Расеі.
Паводле ведамства, расейскія знішчальнікі Су-35С маюць адпрацаваць палёты на максімальную адлегласць, пасадку на беларускія аэрадромы, а таксама сумесна з беларускімі спецыялістамі падрыхтавацца да паўторных вылетаў.
Адзначаецца, што праверка сілаў рэагавання Саюзнай дзяржавы пройдзе ў два этапы.
Першы этап працягнецца да 9 лютага, ягоным вынікам мусіць быць стварэнне групоўкі войскаў на тэрыторыі Беларусі.
Запланаваныя таксама «арганізацыя аховы і абароны важных дзяржаўных і ваенных аб’ектаў, ахова Дзяржаўнай мяжы ў паветранай прасторы, праверка гатовасці і здольнасці дзяжурных па супрацьпаветранай абароне выканаць задачы па прыкрыцці важных абʼектаў на тэрыторыі Беларусі».
Другі этап запланаваны на 10-20 лютага. «Будзе праведзенае сумеснае вучэнне «Саюзная рашучасць-2022», у межах якога будуць адпрацаваныя пытанні стрымання і адбіцця вонкавай агрэсіі, а таксама процідзеяння тэрарызму і абароны інтарэсаў Саюзнай дзяржавы», – удакладнілі ў Мінабароны Расеі.
ЗК belsat.eu
