Кіраўнік Данецкай абласной вайсковай адміністрацыі Паўло Кірыленка адзначае, што становішча ў блакадным Марыупалі застаецца цяжкім. Спасылаючыся на папярэднія ацэнкі, у горадзе загінулі прыблізна 22 тысячы чалавек, паведамляе Бі-Бі-Сі.
На думку чыноўніка, ацэнка колькасці ахвяраў у Марыупалі ўскладняецца, бо горад застаецца ў аблозе і блакадзе. Кірыленка адзначыў, што амаль два месяцы людзі былі без пітной вады, ежы ды святла, жылі пад ракетнымі абстрэламі і фактычна не мелі магчымасці пакінуць горад праз гуманітарныя калідоры. Паводле падлікаў абласной адміністрацыі, імаверная колькасць загінулых у Марыупалі дасягае 22 тысячаў чалавек. Незалежныя ацэнкі колькасці ахвяраў зрабіць пакуль немагчыма.
Кірыленка таксама пракаментаваў паведамленні пра магчымую хімічную атаку ў Марыупалі, падрабязнасці якой пакуль цалкам не пацверджаныя:
«Мы ведаем, што мінулаю ноччу каля поўначы беспілотнік скінуў нейкае пакуль невядомае выбуховае прыстасаванне. Людзі на тэрыторыі Марыупальскага металургічнага заводу і вакол яго сталі адчуваць сябе кепска».
Вайсковы губернатар вобласці сказаў, што паведамленні з месца здарэння былі папярэднімі, таму ён не можа «на 100 % пацвердзіць або пракаментаваць іх», але можа пацвердзіць, што інцыдэнт адбыўся.
ЗХ belsat.eu