Джон Болтан пра стасункі ЗША з Беларуссю: «Існуюць істотныя складанасці»


Размова Аляксандра Лукашэнкі і дарадца прэзідэнта ЗША па нацыянальнай бяспецы Джона Болтана доўжылася больш за дзве гадзіны. Болтан назваў сустрэчу «вельмі важнай», хоць яны з Лукашэнкам «і не прыйшлі да нейкіх канкрэтных рашэнняў», паведамляе «Радыё Свабода».

Па ягоных словах, размова праходзіла «на шырокія тэмы – палітыкі, эканомікі, па пытаннях бяспекі, як у рэгіёне, так і ва ўсім свеце».

«Існуюць істотныя складанасці ў двухбаковых адносінах паміж Беларуссю і ЗША, у тым ліку ў пытаннях правоў чалавека, нераспаўсюджвання зброі, якія трэба абмеркаваць. Другая тэма – гэта новая геапалітычная рэальнасць у рэгіёне, з якой мы мусім лічыцца, працаваць разам, – сказаў Болтан журналістам пасля сустрэчы. – Вельмі рады, што ў нас была такая магчымасць для размовы. Мы пакуль не вырашылі гэтыя пытанні, але без такіх размоваў іх вырашэнне немагчымае».

Адказваючы на пытанне пра пагрозы для незалежнасці Беларусі ў святле інтэграцыі з Расеяй, Болтан заявіў, што самае галоўнае – «чаго хочуць людзі Беларусі»:

«Я думаю, што яны ўсё яшчэ хочуць незалежнасці».

Паводле дарадцы Трампа, пытанне ўзнаўлення дыпламатычных стасункаў паміж ЗША і Беларуссю на ўзроўні амбасадараў не абмяркоўвалася падчас сустрэчы з Лукашэнкам.

Размова кіраўніка Беларусі і дарадцы Трампа адбывалася ў менскім Палацы Незалежнасці. Лукашэнка напачатку сустрэчы назваў візіт Болтана гістарычным. «Нягледзячы на ​​ўсю шуміху, якая адбываецца вакол вашай паездкі, тут шмат станоўчага, асабліва для Беларусі», – падкрэсліў ён. Лукашэнка прапанаваў Болтану адкрыта і па-сяброўску абмеркаваць пытанні беларуска-амерыканскіх стасункаў. Дарадца Трампа ў сваю чаргу адзначыў: «Ёсць некалькі пытанняў, якія вельмі цікавяць ЗША: правы чалавека, нераспаўсюджванне зброі. Я згодны з вамі, што мы павінны быць крайне адкрыты па гэтых тэмах. Думаю, мы зможам знайсці агульную мову».

«Тут шмат станоўчага, асабліва для Беларусі». Лукашэнка назваў візіт дарадцы Трампа гістарычным

ІІ belsat.eu

Глядзі таксама
Каментары