Турцыя не анулюе кантракт на набыццё расейскіх зенітна-ракетных комплексаў С-400. Пра гэта прэзідэнт Турцыі Рэджэп Таіп Эрдаган заявіў журналістам, вяртаючыся з Сочы, дзе ён сустракаўся з Уладзімірам Пуціным.
«Мы заключылі з Расеяй здзелку па С-400, таму не можа быць гаворкі пра тое, каб вярнуць назад. Справа зробленая. Мы працягваем працу, зыходзячы з абяцанняў [Расеі] пачаць пастаўкі ў ліпені», – цытуе турэцкага лідара агенцтва «Анадолу».
Віцэ-прэзідэнт ЗША Майк Пэнс пракаментаваў рашэнне Анкары падчас канферэнцыі ў Мюнхене.
«Мы далі зразумець, што мы не будзем сядзець склаўшы рукі, калі саюзнікі па NATO набываюць зброю ў нашых супернікаў. Мы не зможам абараняць Захад, калі саюзнікі будуць залежаць ад паставак зброі з Усходу», – заявіў віцэ-прэзідэнт ЗША падчас канферэнцыі па бяспецы.
Раней ЗША заклікалі Турцыю адмовіцца ад С-400 і прапанавалі аналагічную амерыканскую сістэму «Patriot». Паводле неафіцыйнай інфармацыі, амерыканцы папрасілі Анкару вызначыцца не пазней за 15 лютага.
Кантракт на пастаўку С-400 быў падпісаны ў 2017 годзе і прадугледжваў наладжванне сумеснай турэцка-расейскай вытворасці ЗРК і перадачу тэхналогіі. Амерыканская адміністрацыя не прапаноўвала сумесную вытворчасць «Patriot».
ЮВ, belsat.eu