Самалёт з беларускай гуманітарнай дапамогай Кітаю, якую ў сувязі з эпідэміяй каронавірусу 2019-nCoV у КНР загадаў накіраваць Аляксандр Лукашэнка, вылецеў з Менску. Пра гэта паведамілі ў Міністэрстве надзвычайных сітуацыяў.
Борт ІЛ-76МД з медыкаментамі, які вылецеў у Пекін з аэрадрому Мачулішчы 29 студзеня, суправаджаюць ратавальнікі на чале з першым намеснікам кіраўніка МНС Аляксандрам Худалеевым. Агульная вага грузу каля 20 тонаў. У склад гуманітарнай дапамогі ўвайшлі 4,5 тоны антыбіётыкаў для лячэння ўскладненняў лёгачных інфекцыяў, больш за 10 тонаў сродкаў дэзынфекцыі, пальчатак, масак, аднаразовай вопраткі, сродкаў абеззаражання паветра.
У МНС адзначылі, што медыкаменты абраныя ў адпаведнасці з запытамі кітайскага боку.
«Ніхто не сумняваецца ў здольнасці Кітая кантраляваць сітуацыю, але цяпер усе яго рэсурсы сканцэнтраваныя ў найбольш небяспечных раёнах. А ў іншых рэгіёнах, у тым ліку на фоне панічных настрояў, можа ўзнікаць ажыятаж на некаторыя лекі або медычныя вырабы. Таму любая дапамога і рэзервы, якія маюцца ў распараджэнні кітайскага Міністэрства аховы здароўя, будуць запатрабаваныя», – заявіў міністр аховы здароўя Уладзімір Каранік, паведамілі ў ягоным ведамстве.
Усе вырабы, якія накіраваныя ў Кітай, выраблены ў Беларусі. Яны загружаліся на борт ваеннага самалёта Міністэрства абароны наўпрост з заводаў.
Паводле міністра, беларускія медыкі таксама таксама гатовыя вылецець у Кітай, каб абмяняцца з калегамі досведам і вызначыць найбольш эфектыўныя метады прафілактыкі распаўсюджвання інфекцыі. Група медыкаў, якіх плануюць накіраваць у Кітай для вывучэння сітуацыі з каронавірусам, ужо сфармавалі.
Візіт адбудзецца, калі ў кітайскага боку будзе неабходны аб’ём інфармацыі і іх эксперты будуць гатовыя да абмену думкамі.
МГ belsat.eu
