Belsat.eu падводзіць вынікі нядзелі, 31 кастрычніка.
Міністр аховы здароўя Дзмітрый Піневіч прызнаў, што інтэнсіўнага зніжэння захворвання на COVID-19 пакуль не назіраецца.
«Мы і не можам чакаць інтэнсіўнага зніжэння захваральнасці. Мы бачым павольную, павольную стабілізацыю. Мы бачым аднолькавыя паступленні хворых і расце колькасць выпісаных пацыентаў. І трохі менш паступае ў стацыянары пацыентаў з пнеўманіямі. Гэта тэндэнцыя прадаўжаецца», – канстатаваў ён у інтэрвʼю «Беларусь 1».
Тым часам, колькасць захварэлых на ковід у Беларусі ад пачатку пандэміі перавысіла ўжо 600 тысяч чалавек. З іх ачунялі 573 994 пацыента.
Паводле Міністэрства аховы здароўя, у Беларусі за содні зарэгістравалі 1985 новых выпадкаў інфікавання каронавірусам. Зафіксаваныя 17 смерцяў. Агулам з пачатку пандэміі ад COVID-19 памерла 4631 асоба, сведчыць міністэрства.
На фудкорце ў менскім ГЦ «Галерэя» памёр 35-гадовы грамадзянін Іраку. Яму раптам стала кепска і ён страціў прытомнасць. Лекары выратаваць мужчыну не змаглі.
Што стала прычынай смерці – невядома.
Паводле Следчага камітэту, мужчына знаходзіўся ў Беларусі з 20 кастрычніка.
Імаверна, гаворка ідзе пра аднаго з «турыстаў», якія выкарыстоўваюць беларускі канал нерэгулярнай міграцыі ў ЕЗ.
Суддзя Заводскага раёна Касцюкевіч пакарала палітвязня Аляксея Зікеева 1,5 гадамі пазбаўлення волі ў папраўчай калоніі ва ўмовах агульнага рэжыму. Вырак быў агучаны 29 кастрычніка, праваабаронцы паведамілі пра гэта сёння.
Зікеева прызналі вінаватым у тым, што ён удзельнічаў у пратэставых маршах у Менску 16, 23, 30 жніўня 2020 года, а таксама 6 верасня 2020 года. Згодна з абвінавачаннем, ён далучыўся да групы грамадзян, пляскаў у ладкі, выкрыкваў лозунгі, перашкаджаў руху транспарту.
Пад вартай палітвязень знаходзіцца з 17 чэрвеня 2021 года. Аляксей Зікееў – мянчук, жанаты, мае 6-гадовага сына. У яго вышэйшая адукацыя, да затрымання працаваў дырэктарам. Таксама ён былы старэйшы следчы, а падчас выбарчай кампаніі 2020 года далучыўся да каманды Валерыя Цапкалы.
Канцлер Аўстрыі Аляксандэр Шаленберг анансаваў правядзенне міжнароднай канферэнцыі ў Вене па «беларускім пытанні». Відэа з заявай канцлера Аўстрыі размясціла на сваёй старонцы ў Twitter Святлана Ціханоўская.
«22 лістапада мы арганізуем міжнародную канферэнцыю ў Вене, разам з грамадзянскай супольнасцю. І я думаю, нам усім павінна быць зразумела: гэта еўрапейская тэма і ўнутры Еўропы мы не павінны размаўляць толькі на мове санкцый», – адзначыў ён.
У якім фармаце будзе праходзіць канферэнцыя і хто будзе на яе запрошаны, не ўдакладняецца.
«Ёсць прагрэс. Канцлер Аўстрыі Шаленберг анансаваў дату канферэнцыі высокага ўзроўню – гэта 22 лістапада. Гэта ініцыятыва Аўстрыі, і менавіта яна фармуе праграму. Мы ведаем, што яны запрашаюць розныя бакі, але наша задача – каб быў прадстаўлены беларускі народ. Нічога пра нас без нас!» – пракаментаваў навіну дарадца Ціханоўскай Франак Вячорка.
Палітвязень Ігар Лосік, які знаходзіцца ў гомельскім СІЗА, прыдумаў, як пацешыць сваю жонку: ён даслаў Дар’і Лосік 17 букетаў кветак.
«Усё пачалося ў 8:44 са званка ў дамафон. Я паглядзела на гадзіннік і падумала, што для ператрусу ўжо позна», – піша Даша ў сваім Instagram і дзеліцца фота і відэа букетаў.
Арганізаваць такі сюрпрыз Ігару дапамаглі розныя людзі.
Каардынатарка Валанцёрскай службы «Вясны», праваабаронца Марфа Рабкова напісала ў лісце, што моцна схуднела ў СІЗА, намагаецца трымаць свой арганізм у тонусе хаця б на прагулках.
«Я трохі веру ў лёс і асабліва не шкадую аб тым, што ўжо адбылося. Я яшчэ веру, што людзі прыходзяць і сыходзяць у наша жыццё не проста так. Я не асабліва веру ў эзатэрыку ўсякую, а вось у гэта веру. Падумаеш яшчэ, што Марфа дзівачка і піша дзіўныя рэчы. Я хоць і сяджу амаль год, але знаходжуся ў сваім розуме і цвёрдай памяці. З маральным станам таксама ўсё ў парадку».
Оперная спявачка Маргарыта Ляўчук запісала кавер на легендарную песню «Пераменаў».
«Кавер на любімую мільёнамі песню Цоя я запісала разам з цудоўнымі музыкамі Уладам і Кірылам, якія больш знаёмыя беларусам як «дыджэі Пераменаў», – распавяла Маргарыта на сваёй старонцы ў Фэйсбуку.
ІІ belsat.eu