Мінулы тыдзень праляцеў хутка – прынамсі, хутчэй за інцыдэнт з самалётам «Ryanair». Самалёт зляцеў, а інцыдэнт коціцца, як снежны ком. «Белсат» перадае, як гэта бачыць мастак Дэ Лёс.
Самалёт пасадзілі, журналіста пасадзілі. Самалёт адпусцілі
23 траўня самалёт «Ryanair» ляцеў з Афінаў у Вільню, атрымаў ад менскага дыспетчара паведамленне пра бомбу на борце і сеў у Менску, хоць да Вільні было бліжэй. На загад Аляксандра Лукашэнкі ў паветра падымалі самалёт-знішчальнік. На зямлі затрымалі журналіста Рамана Пратасевіча і ягоную сяброўку, грамадзянку Расеі Соф’ю Сапегу. Беларускія ўлады даводзяць, што самалёт цалкам законна пасадзілі ў Менску, і не звязваюць затрыманне Пратасевіча з паведамленнем пра бомбу. Аднак наўпрост нават не кажуць, што нібыта «Пратасевіч выпадкова аказаўся на самалёце». Гэты момант апускаюць.
ХАМАС не хоча псаваць рэпутацыю Беларуссю
Паводле версіі беларускіх уладаў, паведамленне пра бомбу прыслалі ад імя тэрарыстычнай арганізацыі ХАМАС – тая нібы патрабавала ад менскага аэрапорту, каб Ізраіль спыніў агонь у Сектары Газа (праз два дні, як Ізраіль там спыніў агонь), і каб Еўразвяз адмовіўся ад падтрымкі Ізраілю. Ды ХАМАС заявіў, што гэта «не яго метады». Арганізацыя, якую прызналі тэрарыстычнай у Еўразвязе, ЗША, Ізраілі, Егіпце, Іярданіі і іншых краінах, казала, што да беларускага інцыдэнту яе спрабуюць прывязаць, каб «дэманізаваць». А потым яшчэ раз заявіла пра сваё абурэнне. Пазней выявілася, што «ліст пра бомбу ад ХАМАС» адправілі ўжо пасля таго, як пра яго казаў менскі дыспетчар – беларускія ўлады на гэта заявілі, што гэта другі ліст, а быў яшчэ першы, ды паштовы сэрвіс адказаў, што «ліст ад ХАМАС» быў адзін.
«Белавіі» перакрылі паветра
У Еўропе і ЗША не паверылі ў афіцыйную беларускую версію. Еўрапейскія палітыкі і сама «Ryanair» назвалі гэта «авіяпірацтвам». Паветраную прастору для беларускіх авіякампаніяў закрылі ўсе суседзі акрамя Расеі, а таксама Францыя, Вялікая Брытанія, Чэхія, Славакія, Фінляндыя, Швецыя, Эстонія. Большасць авіякампаніяў адмовілася ад палётаў над Беларуссю.
Мэр Рыгі замяніў сцяг Беларусі: дзяржаўны на нацыянальны
У адказ на тое, што Еўропа называе «паветраным пірацтвам», мэр Рыгі і міністр замежных справаў Латвіі 24 траўня знялі чырвона-зялёны сцяг і паднялі бел-чырвона-белы каля гатэлю «Radisson Blu», дзе лунаюць сцягі краінаў – удзельніц хакейнага чэмпіянату свету. Міжнародная федэрацыя хакею пакрыўдзілася – дык мэр Рыгі зняў і яе сцяг. Беларусь абвясціла аб высылцы амбасадара Латвіі і ўсяго персаналу амбасады, Латвія адказала тым жа. А замена дзяржаўнага беларускага сцяга на нацыянальны становіцца міжнароднай акцыяй.
TUT.by заблакавалі, яго супрацоўнікаў пасадзілі, а ён працуе
Ад 18 траўня самы наведвальны партал Беларусі TUT.by недасяжны, а 15 чалавек затрыманыя ў «справе TUT.by». 28 траўня ўсе яны не выйшлі на волю – то значыць, ім выставілі абвінавачанне. У чым вінавацяць – не вядома дакладна, але ўлады звязвалі гэта з тым, што кампанія «ТУТ БАЙ МЕДЫЯ» нібы ўхілялася ад сплаты падаткаў, бо нібы незаконна была чальцом «Парку высокіх тэхналогіяў» (аж з 2019 году – проста раней гэтага не заўважалі). Але затрымалі не ўсіх супрацоўнікаў TUT.by, а рэдакцыя працягвае публікаваць навіны ў Telegram і ў сацсетках.
АА, малюнкі Дэ Лёс belsat.eu