У аўторак, 4 красавіка, былы прэзідэнт Злучаных Штатаў Амерыкі прыбудзе ў Нью-Ёрк для таго, каб паўстаць перад вярхоўным судом штату ў Мангэтане. Ці надзенуць кайданкі на 45-га прэзідэнта Амерыкі, мы спыталі ў палітолага-амерыканіста Аляксандры Філіпенкі.
Аляксандра адзначыла, што пакуль ніякіх афіцыйных абвінавачанняў Дональду Трампу не выстаўлена. Прад’явяць іх толькі ў аўторак, пасля таго, як сам палітык з’явіцца ў судзе. Менавіта там судовы прэс-сакратар зачытае іх афіцыйна.
У аўторак Трамп, хутчэй за ўсё, пройдзе агульнапрынятую працэдуру: здасць адбіткі пальцаў, сфатаграфуецца, пасля чаго суддзя прызначыць дату наступнага паседжання, на якім ужо адвакаты падабароннага змогуць прадставіць сваё бачанне справы.
«У дадзеным выпадку, – кажа Аляксандра Філіпенка, – Трамп абсалютна дакладна застанецца на свабодзе, бо згодна з законамі штату Нью-Ёрк пракуроры не могуць патрабаваць, каб чалавек, які абвінавачваецца ў негвалтоўных злачынствах, быў узяты пад варту, або быў адпушчаны пад задатак. Хутчэй за ўсё, яго адпусцяць пад падпіску аб нявыездзе».
У прэсе зараз асабліва падкрэсліваецца, што гэта першы выпадак у гісторыі ЗША, калі былы прэзідэнт становіцца фігурантам крымінальнай справы. Тым не менш на памяць адразу прыходзіць справа, датычная сувязяў Біла Клінтана з Монікай Левінскі. Розніцу паміж гэтымі працэсамі Аляксандра Філіпенка патлумачыла тым, што справа Клінтана вялася ў рамках расследавання Кангрэсу і мела на мэце імпічмент прэзідэнту, «гэта было не крымінальнае расследаванне». Трампа ж абвінавачваюць у рамках судовай, а не выканаўчай улады. Абвінавачванне заключаецца не ў тым, што Трамп меў сувязь з порнаакторкай Стормі Дэніелс, а ў тым, што ён выкарыстаў сродкі перадвыбарнай кампаніі неналежным чынам.
«Гэта ўжо больш сур’ёзныя абвінавачанні, упершыню прэзідэнт ЗША становіцца фігурантам крымінальнай справы. Гэта ўвогуле ўсю палітычную і прававую сістэму Злучаных Штатаў рухае на нейкую нязведаную тэрыторыю. І далей, паколькі ў ЗША прэцэдэнтнае права, гэты прэцэдэнт будзе вельмі важны ў амерыканскай юрыдычнай і палітычнай гісторыі», – падкрэсліла экспертка.
На пытанне, ці паўплывае на палітычную кар’еру Трампа гэты выпадак, Аляксандра Філіпенка адказала, што з першага погляду можа падацца, быццам гэта нейкая змова супраць Трампа. Прычым і дэмакраты, і рэспубліканцы абвінавачваюць адно аднаго ў гэтай змове. Так, дэмакраты гавораць, што гэтае абвінавачванне вельмі слабое, і яно згуляе Трампу на руку. З іншага боку, рэспубліканцы заяўляюць, што дэмакраты любымі спосабамі хочуць адхіліць Трампа ад магчымасці ўдзельнічаць у выбарах. Але, адзначае Аляксандра, улічваючы не самы высокі рэйтынг, які сёння мае палітык, у яе няма адчування, што нейкія змовы маюць месца.
Пры гэтым Аляксандра звяртае увагу на тое, што «Трамп невінаваты, пакуль не даказана адваротнае. Таму ён можа гаварыць усё, што заўгодна, даваць любыя інтэрв’ю, як заўгодна выступаць». Адпаведна палітык можа і надалей абсалютна спакойна ўдзельнічаць у прэзідэнцкай гонцы, бо ягоная віна не даказаная.
«Адзінае абмежаванне, якое будзе абвешчана ў аўторак, – адзначае экспертка, – ён павінны будзе заставацца ў штаце Нью-Ёрк. Ён не зможа падарожнічаць па краіне, што, канечне ж, вельмі важна падчас прэзідэнцкай гонкі. Але ніяк гэтае абвінавачванне не будзе абмяжоўваць яго ў выступленнях онлайн, у якіх заўгодна інтэрв’ю і ў падарожжах – праўда, толькі па штаце Нью-Ёрк».
Нагадаем, Вялікае журы ў Нью-Ёрку прагаласавала за тое, каб былому прэзідэнту Злучаных Штатаў Амерыкі Дональду Трампу было прад’яўлена абвінавачанне ў справе аб падробцы фінанасавых дакументаў капаніі Trump Organization. Палітыку пагражае абвінавачанне па 30 пунктах. Сярод іх прэтэнзіі ў выплаце 130 тысяч долараў порназорцы Стормі Дэніелс за маўчанне пра сэксуальную сувязь, што мела месца дзесяццю гадамі раней.
Раман Шавель belsat.eu
