У актывісткі Алены Гнаўк з вёскі Ткачы Пружанскага раёну вечарам 27 верасня адбыўся ператрус. Пра гэта яна паведаміла ў сваім Instagram.
Пасля ператрусу вынялі тэхніку: старэнькі ноўтбук, флэшку і мабільны тэлефон.
Вобшук у актывісткі праходзіў у межах справы аб пагрозах Міхаілу Булыгіну – старэйшаму пракурору Берасцейскай гарадской пракуратуры. Алена праходзіць сведкай у справе, узбуджанай за публікацыю асабістых звестак пракурора Булыгіна ў тэлеграм-канале «ЧКБ Брест и область».
Менавіта пракурор Булыгін рэпрэзентаваў дзяржабвінавачанне на судзе над Гнаўк 2–3 верасня. Тады жанчыну асудзілі да трох гадоў «хатняй хіміі» за абразу Лукашэнкі.
Таксама 7 траўня актывістку асудзілі ў «справе карагодаў» (ч. 1 арт. 342 КК) да двух гадоў «хатняй хіміі» і шмат разоў затрымлівалі ў адміністратыўных справах.
АД, belsat.eu
