Ева на волі, Бабарыка – не. Галоўнае за мінулы тыдзень – у малюнках мастака Дэ Лёс
Санкцыі, «справа «Белгазпрамбанку», забарона сцяга і таран амбасады – паказваем, як Дэ Лёс пабачыў падзеі мінулага тыдня.
На мінулым тыдні Еўразвяз увёў не толькі традыцыйныя персанальныя санкцыі супраць атачэння Аляксандра Лукашэнкі, але і сектаральныя – супраць цэлых галінаў эканомікі Беларусі. Свае санкцыі пашырылі і Злучаныя Штаты. Мы разабралі, наколькі гэтыя санкцыі жорсткія, а Дэ Лёс – намаляваў.
Санкцыі пакуль не прывялі да вызвалення палітычных вязняў, але арыштаваныя год таму карціны з калекцыі «Белгазпрамбанку», у тым ліку славутую «Еву» Хаіма Суціна, вызвалілі.
А былому дырэктару «Белгазпрамбанку» Віктару Бабарыку просяць 15 гадоў турмы. Ён не пагаджаецца і кажа, што злачынстваў не чыніў. Праваабаронцы таксама так лічаць, прызналі яго палітычным вязнем. Што лічыць суд, стане вядома 6 ліпеня.
Міністэрства ўнутраных справаў Беларусі тым часам просіць пасадзіць прызнаць калабарацыянісцкаю сімволікаю бел-чырвона-белы сцяг, а таксама забараніць лозунг, у якім сцвярджаецца існаванне Беларусі. Гісторыкі кажуць, чырвона-зялёнаму сцягу ад таго лепей не стане. Пры тым у Беларусі ўжо садзяць пад арышт і за сцяг у лесе, і за дзеяслоў «жыць» у цяперашнім часе.
Куды больш хочуць беларусы – у Еўразвяз ці ў Расею? Паводле колькасці таранаў амбасад за мінулы тыдзень, лік 1:1. 23 чэрвеня эвакуатар урэзаўся ў цагляны плот амбасады Латвіі ў Менску (афіцыйная версія – праз неасцярожнасць). А 26 чэрвеня легкавік урэзаўся ў вароты амбасады Расеі – кіроўца спрабаваў схавацца з месца здарэння, пазней яго затрымалі.
АА, малюнкі Дэ Лёс belsat.eu
