Начальнік факультэту Генштаба Ігар Дземідзенка ў інтэрв’ю «ВоенТВ» распавёў, як змяніліся падыходу да навучання пасля пачатку поўнамаштабнага ўварвання Расеі ва Украіну.
«Канешне, мы не можам не ўлічваць досвед апошніх узброеных канфліктаў і лакальных войнаў. Праводзім вайскова-навуковыя канферэнцыі ў сябе на факультэце, запрашаем непасрэдна ўдзельнікаў «спецыяльнай ваеннай аперацыі» з Узброеных сілаў Расейскай Федэрацыі і абменьваемся досведам», – заявіў генерал-маёр Дземідзенка.
Паводле яго, вялікую дапамогу ў навучанні на факультэце аказваюць «структурныя падраздзяленні Міністэрства абароны і Генеральнага штабу».
«Гістарычна так заведзена, што пэўны курс заняткаў з намі праводзяць начальнікі структурных падраздзелаў, пачынаючы з міністра абароны і начальніка Генштабу. Мы не губляем сувязяў з практыкай», – зазначыў генерал-маёр.
Дземідзенка ў інтэрв’ю згадаў толькі прадстаўнікоў Узброеных сілаў РФ. Аднак вядома, што да падрыхтоўкі беларускіх вайскоўцаў прыцягваюць таксама наймітаў ПВК Вагнэра.
1 сакавіка ў інтэрв’ю газеце «СБ-Беларусь сегодня» намеснік міністра абароны Андрэй Жук паведаміў, што вайскоўцы Узброеных сілаў цяпер актыўна ўдасканальваюць баявую падрыхтоўку, у тым ліку з прыцягненнем «спецыялістаў ПВК Вагнэра». «Хачу заўважыць, што не толькі вайскоўцы вайсковых частак праходзяць гэтую падрыхтоўку, але і выкладчыкі ведамасных вышэйшых навучальных установаў, каб перадаць атрыманыя веды курсантам, студэнтам, тым, хто вучыцца на праграмах афіцэраў запасу», – падкрэсліў Жук.
Глеб Нержын belsat.eu