Вакцына «Спутнік V», якую прапануюць беларускія медычныя ўстановы для абароны ад каронавіруса, стала зусім неэфектыўнай супраць новых штамаў хваробы. Аб гэтым заявіў дырэктар расейскага Навукова-даследчага цэнтру эпідэміялогіі і мікрабіялогіі імя Гамалеі Аляксандр Гінцбург.
Навуковец адзначыў, што яшчэ пакуль нельга казаць аб тым, што пандэмія COVID-19 завершаная, вірус пастаянна эвалюцыянуе і прыстасоўваецца.
У сувязі з гэтым зыходны «Спутнік V» абараняў ад COVID-19 цягам першых двух гадоў: з жніўня 2020 года да ліпеня 2022-га. З сярэдзіны лета 2022 года, калі з’явіліся варыянты «амікрон» 1, 2 і 3, эфектыўнасць «Спутніка V» знізілася ў 8 разоў. А калі з’явіўся «амікрон» 4 і 5 – нават у 20 разоў.
«А калі з’явіўся ХВВ. 1.5-варыянт «амікрона» («кракен»), – гэта было ў студзені 2023 года, – «Спутнік» перастаў абараняць проста зусім. Таму трэба было яшчэ летам мінулага года мяняць антыгенны склад вакцыны», – адзначыў Аляксандр Гінцбург.
Пры гэтым навуковец адзначыў, што зараз вядуцца клінічныя выпрабаванні абноўленага «Спутніка» на аснове XBB.1.5, якія скончацца 10 снежня. Пры гэтым згодна з расейскім заканадаўствам, пачынаючы ад гэтай даты навукоўцы пачнуць напрацоўваць серыі, а пасля праводзіць іх праверку. Усё гэта прывядзе да ссоўвання тэрмінаў уводу вакцыны ў грамадзянскі зварот яшчэ на 2,5 месяцы. Гэта значыць, прышчапляць ёй пачнуць недзе з сакавіка 2024 года.
Нагадаем, што намеснік міністра аховы здароўя Юрый Горбач заклікаў беларусаў праходзіць вакцынацыю ад COVID-19 і адзначыў, што на сённяшні дзень у Беларусі можна прышчапіцца вакцынамі «Гам-Ковід-Вак», «Спутнік Лайт». Паводле ягоных словаў «гэта вакцыны, якія поўнасцю прайшлі кантроль якасці, колькасць антыгену ў іх у параўнанні з мінулым годам павялічана ў тры разы, і гэта адпавядае лепшым сусветным стандартам».
Раман Шавель belsat.eu