Міністр абароны Польшчы Мар’юш Блашчак заявіў, што сёлета ў Аўгуставе паўстане сапёрны батальён. Ягонай асноўнай задачаю будзе ахова сувальскага калідору і ўмацаванне ўсходняй мяжы. Блашчак паведаміў пра гэта сёння падчас візіту ў Аўгустаў, перадае агенцтва PAP.
Міністр абароны Польшчы Мар’юш Блашчак анансаваў з’яўленне сапёрнага батальёну ў Аўгуставе непадалёку ад мяжы з Беларуссю. Асноўнай задачаю фармавання будзе ўмацаванне ўсходняй мяжы і сувальскага калідору – міністр растлумачыў яго важнасць стратэгічнымі шляхамі зносінаў.
Блашчак падчас прамовы ў Аўгуставе адзначыў, што прысутнасць войска там гарантуе бяспеку:
«Акрамя польскіх жаўнераў мы можам бачыць сёння тут вайскоўцаў саюзнікаў, у тым ліку амерыканскіх, брытанскіх, румынскіх і харвацкіх, якія трэнуюцца поруч у паўночна-ўсходняй частцы нашай краіны – у стратэгічна важным месцы з гледзішча гарантавання бяспекі Польшчы і ўсяго ўсходняга флангу NATO».
Стварэнне батальёну ў Аўгуставе – частка адмысловага плану ўзмацнення ўзброеных сілаў, што быў ухвалены ўрадам Польшчы летась.
Сёння на перасоўванне польскіх вайскоўцаў да мяжы з Беларуссю Аляксандр Лукашэнка скардзіўся прэзідэнту Расеі Уладзіміру Пуціну.
«Я адмыслова прывёз вам мапу аб перакідванні ўзброеных сілаў Польшчы да межаў Саюзнай дзяржавы. Мы бачым: рыхтуецца глеба. Адна брыгада знайшла месца за 40 кіламетраў ад Берасця. Стаялі за 500 кіламетраў, перакінулі на 40. Мапу я пакажу. Мы гэта ўсё бачым. І крыху болей за 100 кіламетраў ад Горадні – другая брыгада перакідваецца», – заявіў Лукашэнка.
Сяргей Крот belsat.eu