Ранкам 22 траўня дыверсійна-выведныя групы ў складзе байцоў Расейскага добраахвотніцкага корпусу і легіёну «Свобода России» перайшлі ўкраінска-расейскую мяжу і атакавалі КПП «Грайваран» у Белгародскай вобласці, пасля чаго баявыя дзеянні перамясціліся на суседнія населеныя пункты РФ. «Белсат» у храналагічным парадку падсумаваў вынікі баёў у Расеі станам на раніцу 23 траўня.
Напярэдадні атакі тэлеграм-канал «Русский Добровольческий Корпус» выклаў кароткія відэа са сваймі вайскоўцамі на фоне табліцаў з назвамі памежных населеных пунктаў Белгародскай вобласці РФ. У сваю чаргу легіён «Свобода России» апублікаваў зварот да жыхароў Расеі, у якім заявіў пра сваё вяртанне на тэрыторыю краіны.
Пасля 11-й гадзіны раніцы 22 траўня з’явіліся паведамленні пра знішчэнне памежнага пункту ў Белгародскай вобласці. Пазней высветлілася, што гаворка ідзе пра КПП «Грайваран» у аднайменным раёне.
Адразу пасля абстрэлу на памежны пераход зайшла калона тэхнікі ў складзе двух танкаў, аднаго БТР і дзевяці браняваных машынаў. Пасля захопу КПП калона высунулася далей углыб тэрыторыі Расеі.
Мясцовы губернатар Вячаслаў Гладкоў у сваім тэлеграм-канале напісаў пра абстрэлы гораду Грайваран і суседніх населеных пунктаў, але атакі на КПП не ўзгадаў.
Адразу пасля гэтага тэлеграм-канал «SHOT» напісаў пра баі з украінскай ДВГ у памежнай вёсцы Дронаўка ў Белгародскай вобласці. Пазней высветлілася, што звесткі пра атаку на гэты населены пункт былі інфармацыйным укідам. Імаверна, гэта было зроблена для адцягвання ўвагі расейцаў ад месца рэальнага ўдару.
Бліжэй да 14-й гадзіны легіён «Свобода России» заявіў пра захоп сяла Казінка ў Грайваронскім раёне (сяло месціцца каля памежнага пераходу). Таксама ў легіёне заявілі пра ўваходжанне перадавых атрадаў у сам райцэнтр.
Толькі а 14:20 Вячаслаў Гладкоў заявіў пра дыверсійна-выведныя групы ЗСУ на тэрыторыі Грайваронскага раёну. Паводле губернатара, Узброеныя сілы РФ разам з памежнай службай прымалі неабходныя захады для ліквідацыі праціўніка.
Праз гадзіну ў легіёне «Свобода России» паведамілі пра захоп яшчэ аднаго сяла – Гара-Падол – і пачатак штурму гораду Грайваран.
Агулам на той момант пад кантролем дыверсантаў былі населеныя пункты Казінка, Глотава і Гара-Падол (усе тры паселішчы размешчаныя шчыльна адно да аднаго па дарозе ад КПП «Грайваран» да аднайменнага райцэнтру).
Пасля 16-й гадзіны тэлеграм-канал «Baza» паведаміў, што мясцовыя ўлады запусцілі ў рэгіёне план «Эдэльвейс», які прадугледжвае збор усяго асабовага складу МУС «для спынення злачынстваў тэрарыстычнага характару».
Праз дзве гадзіны губернатар Гладкоў напісаў пра ўвядзенне ў Белгародскай вобласці рэжыму контртэрарыстычнай аперацыі.
Пазней Гладкоў паведаміў, што большая частка насельніцтва атакаваных вёсак і гораду Грайваран пакінула тэрыторыю баявых дзеянняў.
А 18:30 тэлеграм-канал «Baza» напісаў, што ДВГ адкінутая ад гораду Грайваран, баі перамясціліся ў сёлы Казінка і Глотава.
А 01:30 ночы 23 траўня тэлеграм-канал «Рыбарь» напісаў, што баі ў абодвух населеных пунктах працягваюцца. Адначасова з гэтым крыніца адзначыла засяроджанне сілаў ЗСУ ў памежных населеных пунктах Харкаўскай вобласці Украіны.
Станам на вечар 22 траўня прарасейскія крыніцы заявілі пра ліквідацыю 39 дыверсантаў і ўзяцце ў палон яшчэ пяцёх. Таксама было вядома пра восем пацярпелых сярод цывільнага насельніцтва, загінулых няма.
Ранкам 23 траўня губернатар Вячаслаў Гладкоў паведаміў, што баі на тэрыторыі Грайваронскага раёну працягваюцца.
ТМ belsat.eu