Высокі суд юстыцыі Лондану адхіліў пазоў кампаніі «Synesis» аб скасаванні санкцыяў Вялікай Брытаніі. Адпаведная пастанова апублікаваная на сайце Нацыянальнага архіву. Гэта першая апеляцыя, якую вывучалі ў Брытаніі паводле палажэння аб судовым пераглядзе мясцовага закону аб санкцыях і барацьбе з адмываннем грошай 2018 года.
Кампанія «Synesis», што распрацавала сістэму сачэння «Kipod», трапіла пад санкцыі Еўразвязу і Брытаніі ў снежні 2020 года. На фірму ўсклалі адказнасць «за рэпрэсіі супраць грамадзянскай супольнасці і дэмакратычнай апазіцыі з боку дзяржаўнага апарату ў Беларусі» і за дапамогу КДБ і Міністэрству ўнутраных справаў.
Спроба «Synesis» аспрэчыць брытанскія абмежаванні аказалася няўдалай. Высокі суд юстыцыі Лондану палічыў, што сістэма «Kipod» сапраўды дапамагае сілавікам «сачыць за грамадзянскай супольнасцю і дэмакратычнымі актывістамі, каб рэпрэсаваць іх».
Сярод матэрыялаў, якія вывучыў суд падчас разгляду справы, – публікацыі незалежных беларускіх медыяў, а таксама інфармацыя, якую перадавала аб’яднанне «ByPol». Асобна разглядалася затрыманне анархіста Мікалая Дзядка. Сілавікі з дапамогаю «Kipod» знайшлі яго ў Асіповіцкім раёне.
«Яны выкарыстоўвалі сістэму мэтанакіравана, а не спрабавалі весці масавае сачэнне. Відавочна, што спадар Дзядок быў асобаю, якая цікавіла беларускі рэжым», – адзначыў суддзя Джэй Робэрт.
Ён падсумаваў, што кампанія «Synesis» была ўцягнутая ў сур’ёзныя парушэнні правоў чалавека ў Беларусі, рэпрэсіі супраць грамадзянскай супольнасці і дэмакратычнай апазіцыі.
Раней пазоў аб скасаванні санкцыяў фірма «Synesis» падала ў суд Еўразвязу, там справу яшчэ не разглядалі.
У леташнім лютым кампанія трапіла пад санкцыі ЗША.
Сяргей Крот belsat.eu