Лондан абвясціў пра новы пакет санкцыяў, які прымеркаваны да другой гадавіны поўнамаштабнага ўварвання Расеі ва Украіну. Абмежаванні закрануць не толькі РФ, але і Беларусь.
Галоўнаю мішэнню новых санкцыяў сталі прадпрыемствы, звязаныя з вытворчасцю боепрыпасаў і электронікі, а таксама кампаніі, якія гандлююць дыяментамі, энерганосьбітамі і металамі. Агулам у санкцыйны спіс дадалі 52 фізічныя і юрыдычныя асобы.
«Нашыя санкцыі пазбаўляюць Пуціна рэсурсаў, якія яму адчайна патрэбныя для фінансавання ягонай цяжкай вайны. Разам мы не саступім перад абліччам тыраніі. Мы працягнем падтрымліваць Украіну ў яе барацьбе за дэмакратыю – столькі, колькі спатрэбіцца», – заявіў міністр замежных справаў Дэйвід Кэмэран.
У санкцыйны спіс у тым ліку ўключаныя два прадпрыемства з Беларусі: ААТ «Планар», што вырабляе паўправаднікі і іншую электроніку, і «Завод дакладнай электрамеханікі», які выпускае розную абаронную прадукцыю. У заяве брытанскага МЗС падкрэсліваецца, што гэтыя прадпрыемствы працуюць на тых кірунках, якія маюць стратэгічнае значэнне.
Глеб Нержын belsat.eu