Выдавецтва «Litaralna» прэзентавала ў аўдыяфармаце кнігу Яна Баршчэўскага «Шляхціц Завальня, або Беларусь у фантастычных апавяданнях» – містычны твор ад аднаго з пачынальнікаў сучаснай беларускай літаратуры.
Творчасць Яна Баршчэўскага прасякнутая беларускім фальклорам і любоўю да жыхароў гарадоў і вёсак паўночнай Віцебшчыны: Полацку, Глыбокага, Расонаў ды іншых. Ён адным з першых спрабаваў звярнуць увагу сучаснікаў на беларускую міфалогію.
«Шляхціц Завальня жыў каля возера Нешчарда. Узімку ён прымаў у сябе вандроўнікаў, якіх адаграваў каля коміна, даваў ім начлег і прасіў за гэта распавядаць казкі, паданні, гісторыі. Было гэта акурат перад Калядамі, таму зараз найлепшы час, каб прасякнуцца магіяй гэтай кнігі», – кажа заснавальнік выдавецтва «Litaralna» Уладзімір Пугач.
Паслухаць аўдыякнігу бясплатна можна на сайце выдавецтва, там жа можна падтрымаць далейшую працу «Litaralna» данатамі.
Гэта ўжо пяты праект выдавецтва. Да гэта былі агучаныя ўсе нумары газеты «Мужыцкая праўда» з удзелам Лявона Вольскага ды іншых вядомых беларусаў, а таксама кнігі «Кароткая гісторыя Беларусі» Вацлава Ластоўскага, «Адвечным шляхам» Ігната Абдзіраловіча ды «Аповесць майго часу» Ігнація Янкоўскага.
Якуб Хруст belsat.eu
