У Кіеве адкрыецца прадстаўніцтва Офісу Святланы Ціханоўскай. Былы дыпламат Валер Кавалеўскі з камандаю паехаў ва Украіну, каб працаваць над пастаянным офісам дэмакратычных сілаў. Пра гэта напісаў у Telegram Кабінет прадстаўнікоў Святланы Ціханоўскай.
Паводле Валера Кавалеўскага, галоўная мэта новага офісу будзе заключацца ў данясенні беларускай пазіцыі ў шэрагу пытанняў:
«Падчас мінулага візіту мяне ўразіла тое, што там вельмі не стае голасу і прысутнасці беларусаў. Таму мы думаем над арганізацыяй нашага пастаяннага офісу ў Кіеве, каб мець пастаянныя камунікацыі з урадам, структурамі, журналістамі, экспертамі ды іншымі прадстаўнікамі Украіны. І, безумоўна, каб падтрымліваць беларускую дыяспару, у якой з’явілася шмат праблемаў пасля пачатку вайны».
Кавалеўскі разам з іншымі ўдзельнікамі Офісу Святланы Ціханоўскай даставяць у Кіеў аўтамабілі з гуманітарным грузам для беларускіх добраахвотнікаў, якія абараняюць Украіну.
Нагадаем, што ў сакавіку 2022 года дэлегацыя дэмакратычных сілаў Беларусі наведала з працоўным візітам Кіеў. Беларусы правялі шэраг сустрэчаў з украінскімі палітыкамі і наведалі добраахвотнікаў, якія змагаюцца ў складзе ЗСУ.
ЗХ belsat.eu