Прадстаўнікі краінаў Еўразвязу пры Еўрапейскай радзе 22 лютага разгледзяць новыя санкцыі супраць Беларусі. Пра гэта сведчыць парадак дня сустрэчы сталых прадстаўнікоў ЕЗ, заўважыў партал Reform.by.
«Рашэнне Рады і выканаўчы рэгламент аб абмежавальных захадах у звязку з сітуацыяй у Беларусі і датычнасцю Беларусі да расейскай агрэсіі супраць Украіны», – пазначана ў адным з пунктаў парадку дня.
У гэтыя ж тэрміны чакаюць рашэння аб 10-м пакеце санкцыяў супраць Расеі.
Раней брусельскі карэспандэнт радыё «Свабода» Рыкард Юзьвяк паведамляў, што «новая прапанова ЕЗ аб санкцыях супраць Беларусі шмат у чым адлюстроўвае некаторыя захады, ужытыя да Расеі: забарона на наданне ІТ і кансалтынгавых паслуг, прадметаў раскошы, а таксама забарона на імпарт сталі і золата».
Але, як і ў выпадку з апошнім пакетам санкцыяў ЕЗ супраць Расеі, узгодненым у канцы 2022 года, адносна ўгнаенняў і харчоў з Беларусі прадугледжаныя выключэнні. Нібыта гэта робіцца «дзеля далейшага развязання праблемаў харчовай бяспекі ў трэціх краінах».
Тады журналіст адзначаў, што праз гэты пункт для беларускага бізнесоўца Івана Галаватага і расейскага мільярдэра Міхаіла Гуцэрыева, набліжаных да Аляксандра Лукашэнкі, могуць адмяніць замарожванні актываў ЕЗ супраць іх.
Святлана Ціханоўская падчас сустрэчы з прэзідэнткай Еўракамісіі Урзуляй фон дэр Ляен 17 лютага запэўнівала, што беларускі рэжым спрабуе абысці санкцыі на калійныя ўгнаенні і пад выглядам клопату пра харчовую бяспеку ў свеце спрабуе дабіцца змякчэння санкцыйнага рэжыму. Таксама Ціханоўская падкрэсліла, што санкцыі павінны біць па рэжыме і яго памагатых, а не па беларусах.
Алена Рувіна belsat.eu
