Уначы расейскія войскі атакавалі Кіеў і Кіеўскую вобласць беспілотнікамі. Іх было каля 20, супрацьпаветраная абарона збіла 15. Ёсць пацярпелыя і пашкоджанні аб’ектаў інфраструктуры, паведамляюць улады.
Паветраную трывогу абвесцілі ў Кіеве і вобласці пасля поўначы. Як паведамляе вайсковая адміністрацыя ўкраінскай сталіцы, «горад вытрымаў некалькі хваляў атак іранскіх «Shahed».
У Кіеве пашкоджаны абʼект крытычнай інфраструктуры. Наступствы ліквідуюцца.
Мэр Віталій Клічко ў сваім Telegram-канале паведаміў пра выбухі ў Шаўчэнкаўскім (цэнтр гораду) і Саламянскім раёнах. Паводле папярэдняй інфармацыі, ніхто не пацярпеў.
У Кіеўскай вобласці ў выніку бамбавання пашкоджаныя абʼекты інфраструктуры і прыватныя дамы. Параненыя дзве асобы, ім надаюць дапамогу, паведамляе Кіеўская абласная вайсковая адміністрацыя.
У Кіеве «да стабілізацыі сітуацыі» пачалі тэрмінова адлучаць электразабеспячэнне.
Сяргей Крот belsat.eu