Кабінет міністраў Украіны 18 верасня вызваліў ад пасадаў шасцярых намеснікаў міністра абароны і дзяржаўнага сакратара міністэрства. Пра гэта паведаміў прадстаўнік Кабінету міністраў у Вярхоўнай Радзе Тарас Мэльнычук.
Усяго звольнена сем чалавек, якія працавалі ў Міністэрстве абароны пры папярэднім міністры Аляксеі Рэзнікаве. Гэта Ганна Маляр, найбольш вядомая з усіх намеснікаў міністра, а таксама Віталій Дэйнэга, Уладзімір Гаўрылаў, Андрэй Шаўчэнка, Дзяніс Шарапаў і Расціслаў Замлынскі. Таксама звольнены Канстанцін Вашчанка, які займаў пасаду дзяржаўнага сакратара Мінабароны Украіны.
Паводле закону Украіны аб органах выканаўчай улады, у выпадку звальнення міністра першы намеснік міністра і намеснікі міністра вызваляюцца ад пасадаў Кабінетам міністраў. Аднак першы намеснік міністра абароны генерал-лейтэнант Аляксандр Паўлюк застаўся на пасадзе.
Нагадаем: Вярхоўная Рада Украіны 5 верасня адправіла ў адстаўку міністра абароны Аляксея Рэзнікава, які займаў гэтую пасаду з 2021 года. На ягонае месца прызначылі Рустэма Умерава.
«Українська правда» са спасылкаю на свае высокапастаўленыя крыніцы ва ўрадзе перадае, што ўсе намеснікі міністра напісалі заявы на звальненне добраахвотна пасля просьбы Рустэма Умерава і больш на гэтыя пасады не вернуцца. Цяпер працягваюцца кансультацыі адносна кандыдатаў у намеснікі міністра абароны. Таксама крыніца адзначыла, што цяпер «ідзе поўнае абнаўленне».
Алена Рувіна belsat.eu
