Супрацьстаянне паміж грамадствам і ўладамі ў Беларусі працягваецца 282 дні. «Белсат» падводзіць вынікі гэтага дня.
У Нямеччыне прайшла цырымонія ўручэння прэміі імя Льва Копелева – за мір і правы чалавека
Уганароўвалі намінантаў за 2020 і 2021 гады.
За 2021 год лаўрэатамі сталі лідары беларускай апазіцыі Святлана Ціханоўская, Марыя Калеснікава і Вераніка Цапкала, а за 2020-ы – расейскі медыя-рэсурс «ОВД-Инфо» і расейскі гісторык Юрый Дзмітрыеў.
З прычыны пандэміі каронавіруса прэміі ўручаліся ў рэжыме онлайн, адразу за два гады.
Міністэрства інфармацыі заблакавала сайт цэнтру дапамогі пацярпелым probono.by
Ініцыятыва probono.by пачала сваю працу 15 жніўня як валанцёрскі праект. Гэта адзіная сістэма адкрытых ініцыятываў дапамогі для затрыманых і арыштаваных на мірных акцыях.
Журналістку Любоў Каспяровіч пакаралі 15-цю соднямі арышту
У судзе Маскоўскага раёну разглядзелі адміністратыўную справу супраць журналісткі Любові Каспяровіч. Яе прызналі вінаватай у несанкцыянаваным пікетаванні (арт. 24.23 КаАП).
Журналістку судзілі праз «Скайп». Суддзя – Сяргей Кацар пакараў Любоў Касьпяровіч 15 соднямі арышту.
У наваградскі Следчы камітэт позвамі выклікалі каля 30 чалавек. Ва ўсіх іх ёсць пратаколы паводле артыкулу 23.34 КаАП
Падставай да выкліку стала расследаванне справы аб абразе пракурора Аляксандр Шляжко і змешчанай пра яго інфармацыі.
«Людзей выклікаюць і дапытваюць літаральна за 10 хвілін. Пытаюцца, які яны маюць нік у мэсэнджары Telegram, а пасля паказваюць спіс нікаў на магчымае іх пазнаванне», – паведамляюць чытачы «Белсату».
Людзі, якія ўжо выйшлі пасля допыту, распавядаюць, што Следчы камітэт расследуе справу аб абразе ў каментарах пракурора Аляксандра Шляжко.
Аляксандр Лукашэнка падпісаў закон «Аб змяненні законаў у пытаннях запэўнівання нацыянальнай бяспекі Рэспублікі Беларусь»
Закон прадугледжвае, што супрацоўнікі праваахоўных органаў не нясуць адказнасці за шкоду, прычыненую ў выніку ўжывання фізічнай сілы, спецыяльных сродкаў, зброі, баявой і спецыяльнай тэхнікі. Акрамя таго, органам ўнутраных справаў надаецца правам выкарыстоўваць баявую і спецыяльную тэхніку пры спыненні масавых акцыяў.
Таксама сілавікі будуць мець права на асабісты дагляд грамадзянаў, іхных рэчаў і транспартавых сродкаў пры затрыманні і змогуць забараняць грамадзянам запісваць відэа і аўдыя пры выкананні службовых абавязкаў і правядзенні працэсуальных дзеянняў.
Фактычна ўсё гэта практыкавалі і раней, але цяпер сілавікі маюць для такіх дзеянняў «законныя» падставы.
Прайшлі першыя суды над затрыманымі на Цнянскім вадасховішчы раварыстамі
Першае паседжанне ў справе раварыстаў правёў Сяргей Шаціла ў судзе Савецкага раёну Менску. 17 траўня ён прызнаў 20-гадовага Бахціяра Муратава і 18-гадовага Рамана Лапіча вінаватымі паводле арт 24.23 КаАП і пакараў Муратава 11 соднямі, а Лапіча – 12 соднямі арышту.
Сваёй віны хлопцы не прызналі. Са словаў Лапіча, спачатку да іх прыехаў адзін бус, затрымалі хлопца ў майцы. Тады астатнія ўдзельнікі спыталі ў супрацоўнікаў АМАПу, ці могуць яны тут застацца. Супрацоўнікі дазволілі, а самі з’ехалі. Праз 20 хвілінаў яны вярнуліся, агледзелі сумкі і запісалі звесткі раварыстаў. Але потым прыехалі яшчэ бусы, і ўсіх раварыстаў затрымалі. Бахціяр зазначыў, што ніякай сімволікі не было, а лозунгаў яны не выкрыквалі.
Вядома, што затрыманыя – удзельнікі «Minsk Fixed Gear». Учора меў адбыцца «Toure de Tsna». Паведамляецца, што адзін чалавек быў затрыманы за майку «АнтиЛукашенко».
Чакаюцца суды над астатнімі раварыстамі.
А тым часам беларусы працягваюць паказваць, што яны не настроеныя спыняцца
Партызаны Койданава-Дзяржынска лічаць, што кожны дзень мы павінны рабіць свой маленькі ўнёсак у агульную Перамогу.
Партызаны з Велазаводу не забываюць пра патрыятызм нават на адпачынку!
Душэўныя і неймаверныя беларусы скарылі вяршыні Саксонскай Швейцарыі, каб над ёй лунаў наш сцяг!
МГМ. belsat.eu
