Выкладчыцу БДУ Наталлю Абрашыну-Жадаеву, якая ў студзені запісала зварот у падтрымку звольненага калегі Максіма Шундалава, таксама звальняюць з працы. Пра гэта яна паведаміла на сваёй старонцы ў Facebook.
«Паважаная Наталля Рыгораўна, інфармуем Вас, што сёння ў 12:00 на прафкаме БДУ будзе разглядацца пытанне аб дачы папярэдняй згоды на вашае звальненне», – такое паведамленне атрымала 17 лютага прафесарка БДУ Наталля Абрашына-Жадаева.
«Вось так мне сёння паведамілі. Сказалі, у 10:30 магу азнаёміцца з паперамі пра мяне. А ў мяне была лекцыя, а зараз іду на заняткі, але не пабягу ў галоўны корпус. Такой непавагі, здаецца, не заслужыла. На зум не запрасілі», – пракаментавала атрыманае паведамленне прафесарка.
22 студзеня 2022 году прафесарка кафедры вышэйшай матэматыкі БДУ Наталля Абрашына-Жадаева на старонцы ў Facebook апублікавала відэа, у якім абурылася фактам звальнення свайго калегі – кандыдата фізіка-матэматычных навук, дацэнта Максіма Шундалава.
«Але больш за ўсё мяне збянтэжыла паведамленне, што калегі з іншых кафедраў пагадзіліся выконваць за яго ягоную нагрузку. Гэта як? Думаюць, што з імі так не зробяць. Што іх такі лёс абміне.
Сёння вы прамаўчалі, а заўтра з вамі гэтак жа разлічацца. Так ужо было ў гісторыі. Кожны сам выбірае: служыць ці прыслужваць. Як кажуць: служыць Богу ці прыслужваць юдзе!», – напісала 22 студзеня Наталля Абрашына-Жадаева.
71-гадовая Наталля Абрашына-Жадаева працуе ў навуцы ад 1972 года. Яна ветэран працы, сёлета спаўняецца 50 гадоў яе працоўнага стажу.
ЗК belsat.eu