Палітвязень Вадзім Плаўскі выйшаў на волю. Ён адбыў пакаранне, быў у няволі больш за год
Яго пераследавала вядомая ў Горадні прыхільніца Лукашэнкі і расейскіх ультраправых. Яго асудзілі за «хуліганства» на паўтара года калоніі.
Палітычны зняволены Вадзім Плаўскі выйшаў на волю 17 студзеня. Жыхар Горадні быў асуджаны на 1,5 гады пазбаўлення волі па справе «белых стужак».
30 кастрычніка 2020 года ён забраў дачку з садка і гуляў з ёй у скверы, дзе на дрэвах і парэнчах віселі белыя стужкі. Да іх падышла прадстаўніца руху «Антывандал-Гродна» і вядомая ў горадзе прыхільніца Лукашэнкі і Пуціна Вольга Бондарава.
Яна пачала здымаць мужчыну на тэлефон, калі ён пачаў адыходзіць ад яе – пачала яго пераследаваць. Адбыўся канфлікт, Плаўскі паваліў Бондараву на зямлю. Яна напісала заяву, у выніку гарадзенца судзілі за «Хуліганства» (арт. 339 КК РБ).
За гэта яго асудзілі на 1,5 гады «хатняй хіміі», але неўзабаве прысуд замянілі на больш жорсткі – «хімію з накіраваннем». Пакаранне Вадзім Плаўскі адбываў у ПК-15 у Магілёве. Дома яго чакаюць двое непаўналетніх дзяцей.
Тыдзень таму, 11 студзеня, выйшаў на волю яшчэ адзін палітвязень з Горадні, які пацярпеў з-за Бондаравай – Васіль Пілец. Ён адбываў пакаранне ў папраўчай установе адкрытага тыпу ў Ваўкавыску (ПУАТ №29).
14 снежня 2020 года ён гуляў з сынам і сабакам па вуліцы. Убачыў, што Бондарава і ейны паплечнік зафарбоўваюць на тратуары нацыянальныя бел-чырвона-белыя сцягі. Пілец штурхаў Бондараву, сарваў маску з паплечніка, перакуліў бляшанку з фарбай. За гэта яго судзілі на 1,5 гады «хатняй хіміі», а неўзабаве прысуд замянілі на больш жорсткі – год калоніі.
Чым вядомая Вольга Бондарава?
- Пасля жнівеньскіх падзеяў 2020 хадзіла па горадзе разам з іншымі «актывістамі» і паведамляла органам пра ўсе развешаныя бел-чырвона-белыя сцягі і налепкі.
- Фігурантка некалькіх палітычных справаў, што заводзіліся на людзей, якія развешвалі ў Горадні сцягі, стужкі ці вывешвалі сцягі на сваім балконе. За гэтае яны былі пакараныя рэальнымі тэрмінамі ці штрафамі.
- Сама Бондарава калісьці таксама прыцягвалася да адміністрацыйнай і крымінальнай адказнасці – за кантрабанду цыгарэт у Польшчу.
Прыходзіла з камерай на Кірава, 3, дзе размяшчаліся «Цэнтр гарадскога жыцця» і крама з нацыянальнай сімволікай «Адметнасць». Пасля гэтага там прайшлі ператрусы. - Зараз актыўна займаецца пошукам новых «ворагаў»: адсочвае ў інтэрнэце і сацсетках людзей з бел-чырвона-белымі фотаздымкамі ці аватаркамі, ці актывістаў разнастайных грамадскіх ініцыятываў і арганізацыяў, і піша на гэтых людзей даносы. З-за такіх даносаў да людзей прыходзілі з ператрусамі, адмяняліся розныя культурніцкія імпрэзы і канцэрты з удзелам гэтых людзей.
- Актыўна збірала подпісы за знясенне крыжоў у Курапатах, у прыватнасці – крыжа ў памяць Вацлава Ластоўскага.
- Настойліва прапаноўвала гарадзенскім уладам знесці пахаванні польскіх жаўнераў, якія ў 1939 годзе ваявалі з саветамі, калі тыя прыйшлі ў Горадню.
- Прыходзіла ў Фарны касцёл Горадні з камерай і спрабавала справакаваць ксяндза.
- Прыходзіла ў галоўны праваслаўны храм Горадні – Свята-Пакроўскі сабор і абуралася іконамі, якія там вісяць з 2007 года. На абразах – выявы мучанікаў, якія загінулі ад пераследу савецкай улады, а таксама выявы салдат Чырвонай арміі.
- Бондарава вядомая сваімі прарасейскімі поглядамі. Выходзіла на мітынгі са сцягам расейскага ўльтраправага руху НОД і «георгіеўскімі стужкамі». Пастаянна перапошчвае ў сваіх каналах суполкі кшталту «Пуцін – наш прэзідэнт» і падобнае.
- Ганебна ставіцца да ўсяго беларускага. Бел-чырвона-белы сцяг Бондарава называе «бчб-анучай», прыхільнікаў пераменаў – «бчбесамі». Абражае беларускую мову. Так, у адным са сваіх відэаролікаў Бондарава абураецца тым, што дзяцей у дзіцячым садку вучаць казаць па-беларуску «дзякуй», «добры дзень», «дабранач», а таксама – тым, што ў школе прадмет «Мая Радзіма Беларусь» вывучаюць толькі на беларускай мове.
СК belsat.eu
