Жалезны конь, двухколавы аўтамабіль і нават найлепшы сябра і палюбоўніца – так гаспадары аднаго з самых экалагічных відаў транспарту называюць свае ровары.
Сезон пачынаецца адразу пасля сыходу снегу і цягнецца да зімы. З плюсаў: хуткасць, трымае ў тонусе, аздараўляе, дый з паркоўкаю праблемаў не бывае, адрозна ад аўтамабіля. Хіба адзіны мінус, які турбуе раварыстаў, – абарона свайго «каня» ад крадзяжу. З гэтае прычыны акурат перад летам мы сабралі для вас топ супрацьугонных роварных сродкаў у Беларусі і Еўропе.
Існуе два віды абароны ад угону: актыўны і пасіўны.
Актыўная абарона ўключае ў сябе розныя механічныя прыстасаванні, якія павінныя ўскладніць працэс крадзяжу. Да іх адносяцца розныя прылады тыпу тросу, ланцугоў, пласцінаў. Таксама ў продажы ёсць блакатары колаў, якія змяшчаюцца паміж спіцамі і не даюць колам круціцца. Праўда, трэба памятаць, што ровар можна проста падняць і знесці.
Пасіўная абарона – гэта тыя дзеянні, якія дапамагаюць ужо пасля крадзяжу: пакрыццё шкоды, пошук і вяртанне гаспадару ягонай маёмасці. Да пасіўных метадаў абароны можна аднесці самастойнае занясенне роварных звестак у прыватную базу, страхоўку.
Калі ж казаць пра папулярныя сродкі абароны ад угону, то мы маглі б параіць набываць не простыя ланцугі, якія можна перарэзаць ці зламаць, а нешта больш нязвыклае. Сярод самых папулярных у продажы цяпер можна знайсці:
Такі сродак абароны складае альтэрнатыву ранейшым. Існуе некалькі яе відаў:
Самастойная – усталёўваецца не ў замок, а асобна ад яго. Пачынае сігналізаваць у момант руху, а дэактывуецца пры дапамозе набору коду з чатырох лічбаў.
Існуе сігналізацыя інтэграваная – з замком-блакатарам.
Ёсць таксама сігналізацыя са зваротнай сувяззю. І гэта самы круты варыянт на сённяшні дзень. Бо прылада не толькі падае сігнал, але і апавяшчае аб крадзяжы на смартфон і адсочвае месцазнаходжанне ровара праз спадарожнік.
Адносна новы тып замкоў, які выкарыстоўвае тэхналогіі Bluetooth ці Wi-Fi для злучэння з вашым смартфонам. Напрыклад, мадэль BitLock. Увогуле можна вылучыць некалькі відаў такой прылады.
Noke U-Lock – не толькі паведамляе гаспадару, што ягоны ровар крадуць, але і фіксуе спосаб узлому. Маскіруецца U-Lock выдатна: з выгляду гэта звычайны U-замок. Але пакуль злачынца спрабуе яго зняць, замок кліча гаспадара на дапамогу.
Lock 8 – мае функцыю геалакацыі і працуе як гучная сігналізацыя. Пры спробе механічнага ўздзеяння прылада пасылае сігнал на ваш смартфон. Нават калі ў ход ідзе гарачы паяльнік ці замарозка, у прыбора ёсць датчык, які рэагуе на змену тэмпературы.
Skylock – паведамляюць сваім уладальнікам пра кожны старонні дотык. Моцная гіперадчувальнасць і адсутнасць ключа – галоўныя прыкметы гэтай прылады. Электронны ключ вядомы толькі ўладальніку, пры гэтым страціць яго немагчыма.
Яны выглядаюць больш сурʼёзна, чым звычайныя ланцугі і цэпы.
Pinhead Bicycle Locking Skewer Set – вельмі дарагі складаны замок, які патрабуе часу на зборку. Справіцца з ім можна, але злодзей мусіць выдаткаваць шмат высілкаў, часу і цярплівасці.
ABUS Bordo Granit X-Plus 6500/85 – каленчаты замок. Таксама няпросты і даволі дарагі. Абусы добрыя сістэмай падвойнай фіксацыі, а таксама функцыяй разблакавання адзіным ключом. Ёсць толькі адзіны мінус – паступовае сціранне суставаў.
Прылада, якая дазваляе адсочваць месцазнаходжанне вашага ровара ў рэальным часе. Напрыклад, мадэль Sherlock. Яны не адрозніваюцца вонкава ад звычайнага роварнага абсталявання, лёгка ўсталёўваюцца і працуюць у аўтаномным рэжыме ад 1 да 30 дзён без наладоўвання. Онлайн-назіранне можна весці праз смартфон ці кампʼютар. На GPS-жучок усталёўваецца віртуальная геазона на мапе вакол паркоўкі, і як толькі ровар пакіне яе межы, вам прыйдзе СМС. Трэкер мантуецца ў раму ці на іншым зручным вам месцы. Галоўнае, каб ён не кідаўся на вочы іншым.
На вашае патрабаванне міліцыя пазначае байк спецыяльным бескаляровым маркерам, які відаць толькі ў святле УФ-лямпы. Яго відаць нават пад дадатковым слоем лаку, калі злачынец паспрабуе перафарбаваць ровар. Пазначаны такім чынам нумар дапаможа вам вярнуць свой байк, калі яго знойдуць праваахоўнікі.
Гэта толькі некаторыя прылады з разнастайнага роварнага свету. Усе яны працуюць, але не страхуюць ад крадзяжу на 100 %. Як кажуць, найлепшая страхоўка – увогуле не мець ровара, бо злачынцы дасканаляцца разам з паступленнем на рынкі новай прадукцыі. Але ж імкнуцца перадухіліць крадзеж абавязкова варта, бо нашмат складаней потым будзе знайсці свой байк, асабліва калі на ім няма ні трэкера, ні сігналкі.
Круцім педалі насустрач лету!
Марыя Голдстэйн belsat.eu