Святлана Ціханоўская: «Я абраны прэзідэнт Беларусі. Я змагаюся за сваю краіну ў выгнанні»
Лідарка дэмакратычнай Беларусі і кіраўніца Аб’яднанага пераходнага кабінету Беларусі Святлана Ціханоўская ў калонцы для бельгійскага выдання «Politico» ўпершыню назвала сябе «абраным прэзідэнтам Беларусі».
Артыкул Святланы Ціханоўскай у «Politico» выйшаў пад назвай «Я абраны прэзідэнт Беларусі, і разам мы пераможам».
У калонцы для бельгійскага выдання Святлана Ціханоўская распавядае гісторыю беларускага доктара, які вывез з Мазыра рэнтгенаўскія здымкі раненняў расейскіх салдатаў, і піша, што Лукашэнку падтрымлівае ў Беларусі не больш за 25 % насельніцтва – у асноўным пенсіянеры, чыноўнікі і супрацоўнікі спецслужбаў.
«Я перамагла Лукашэнку на прэзідэнцкіх выбарах 2020 года, пакуль ён не скраў іх з дапамогаю КДБ, сілавікоў і Пуціна», – адзначае Святлана Ціханоўская.
Дэмакратычная лідарка называе ў тэксце беларусаў «прынцыповымі еўрапейцамі» і падкрэслівае, што «падтрыманне Лукашэнкам незаконнай вайны Пуціна вельмі непапулярнае ў Беларусі».
«Беларусы прызнаюць Лукашэнку ваенным злачынцам і спадзяюцца, што ён стане перад судом. Большасць проста хоча, каб ён сышоў», – напісала ў артыкуле Ціханоўская.
Паводле аўтаркі, зрынанне Лукашэнкі паскорыла б перамогу Украіны: «А без вольнай Беларусі не будзе ні бяспечнай Украіны, ні бяспечнай Еўропы». Яна пералічвае захады, якія маюць дапамагчы беларусам, і кажа пра Абʼяднаны кабінет як пераходны ўрад Беларусі, што будзе працаваць да новых выбараў.
«Я абраны прэзідэнт Беларусі. Я змагаюся за сваю краіну ў выгнанні. Але я працягваю падтрымліваць нашых людзей. І разам мы пераможам», – завяршае артыкул Святлана Ціханоўская.
Зміцер Міраш belsat.eu
