У палестынска-ізраільскім канфлікце ўжо загінулі 12 журналістаў. Ёсць параненыя і зніклыя
З пачатку ваеннага супрацьстаяння ў Ізраілі і Палестыне загінулі 12 журналістаў розных выданняў. Яшчэ восем – атрымалі розныя раненні, двое зніклі без вестак. Пра гэта паведамляе Камітэт абароны журналістаў (КАЖ).
Як адзначаецца, загінуў адзін палестынскі журналіст, адзін ізраільскі, а 13 кастрычніка забілі журналіста з Лівану.
«CPJ падкрэслівае, што журналісты – гэта цывільныя асобы, якія выконваюць важную працу падчас крызісу, і яны не павінны пераследавацца ніводным з бакоў вайны», – сказаў Шэрыф Мансур, каардынатар праграмаў КАЖ на Блізкім Усходзе і ў Паўночнай Афрыцы.
Ён заклікаў усе бакі запэшніваць бяспеку журналістаў, «каб спыніць гэтыя смяротныя і цяжкія страты».
Сярод забітых журналістаў пераважаюць работнікі мясцовых арабскіх выданняў, у тым ліку працаўнік звязанага з «Хамасам» радыё «Al Aqsa», але ёсць і ліванскі карэспандэнт «Reuters» ды забіты баевікамі ізраільскі журналіст. Сярод параненых жа пераважаюць журналісты міжнародных медыяў: «Reuters», «Al-Jazeera TV», AFP. Таксама паведамляецца пра затрыманне і палон некалькі ізраільскіх і палестынскіх журналістаў.
Нагадаем, што ў вязніцах Беларусі трымаюць 13 журналістаў, якія раней супрацоўнічалі з «Белсатам». Гэта траціна ад усіх супрацоўнікаў медыяў, якія застаюцца ў турмах Беларусі.
Якуб Хруст belsat.eu
