Экзітпол кампаніі Ipsos сведчыць, што кіроўная партыя «Закон і справядлівасць» лідаруе на парламенцкіх выбарах з вынікам 36,8% і атрымоўвае 200 мандатаў. На другім месцы – апазіцыйная Грамадзянская кааліцыя (31,6% і 163 мандатаў). Яўка склала 72,9%.
«Вынікі апытанняў даюць нам чацвёртую ў гісторыі партыі перамогу на парламенцкіх выбарах і трэцюю запар. Гэта вялікі поспех», – заявіў старшыня партыі «Закон і справядлівасць» Ярослаў Качыньскі, калі былі абвешчаныя вынікі экзітполу.
Паводле папярэдніх звестак, кіроўная партыя «Закон і справядлівасць» перамагае на парламенцкіх выбарах з вынікам 36,8% і атрымоўвае 200 мандатаў. На другім месцы – Грамадзянская кааліцыя (31,6% і 163 мандатаў).
Трэці вынік – у правацэнтрысцкай кааліцыі «Трэцяя дарога» (13%, 55 мандатаў), чацвёртае месца – у «Левых» (8,6%, 30 мандатаў). Пятаю ідзе крайне правая Канфедэрацыя (6,2%, 12 мандатаў). Беспартыйныя набіраюць 2,4% і ў парламент не трапляюць.
Яўка, паводле звестак Ipsos, склала 72,9% – і гэта максімум за 34 гады. Дагэтуль найвышэйшая яўка на выбарах у Сейм была ў 1989-м: 62,5%.
Лідар Грамадзянскай кааліцыі Дональд Туск, каментуючы дадзеныя экзітполу, назваў сябе самай шчаслівай асобаю на свеце. «Польшча перамагла, дэмакратыя перамагла. Мы адхілілі іх ад улады. Гэта канец кіравання PiS», – сказаў палітык.
Хаця партыя «Закон і справядлівасць» перамагла на выбарах, бальшыню ў парламенце можа сфармаваць апазіцыя, калі аб’яднаюцца Грамадзянская кааліцыя, «Трэцяя дарога» і «Левыя». У іх будзе 248 мандатаў супраць 200 у кіроўнай партыі. Агулам у Сейме 460 месцаў.
Канчатковыя вынікі галасавання плануюць абвесціць у аўторак, 17 кастрычніка.
Сяргей Крот belsat.eu