Актывістку Матчынага руху 328 асудзілі за абразу Лукашэнкі да чатырох гадоў «хіміі»
У судзе Кастрычніцкага раёну Менску да чатырох гадоў абмежавання волі з накіраваннем у папраўчую ўстанову адкрытага тыпу асудзілі палітзняволеную актывістку Матчынага руху 328 Марыну Кісялевіч, паведамляе праваабарончы цэнтр «Вясна».
Жанчыну судзілі па «даносе неабыякавага» за допісы «УКантакце» паводле двух дыфамацыйных артыкулаў Крымінальнага кодэксу Беларусі: ч. 2 арт. 368 («Абраза прэзідэнта») і ч. 2 арт. 367 («Паклёп на прэзідэнта»).
30 снежня 2021 года Марыну Кісялевіч выклікалі ў міліцыю, каб апытаць наконт нейкіх допісаў «УКантакце». Жанчына адмаўляла сваю датычнасць. Марыну пакінулі на ноч у РАУСе, дзе яна выпіла пачак снатворнага, пасля чаго трапіла ў рэанімацыю. Пасля яе накіравалі ў РНПЦ псіхічнага здароўя ў Навінках, потым перавялі ў жодзінскую турму да суда.
Пад вартаю Марыну Кісялевіч утрымлівалі цягам чатырох з паловаю месяцаў. У турме яе змяшчалі ў карцар за нязгоду з пастаноўкаю на ўлік як «схільную да экстрэмісцкай ды іншай дэструктыўнай дзейнасці», а яна абвяшчала галадаванне.
«Мяне змясцілі ў карцар на пяць дзён за тое, што я не была згодная з пастаноўкаю на ўлік як нібыта схільныя да суіцыду і экстрэмізму, – распавядала жанчына на сваёй старонцы ў Facebook. – Я даказвала, што я не схільная, а паводле артыкулу 16 КПК не вінаватая і пастаноўка на ўлік незаконная. А прымус агаворваць сябе – гэта ўжо артыкул 394 КК. У карцары я абвясціла галадоўку. Галадала ўсе пяць дзён, пакуль там была. Грэлі мяне шкарпэткі і пах лавандавага мыла».
Прысуд Марыне вынес суддзя Аляксандр Рудэнка.
Сыну актывісткі прысудзілі ў 2017 годзе 13 гадоў калоніі.
ГГ, belsat.eu
