Пакаранні – да 12 гадоў пазбаўлення волі.
Аляксандр Лукашэнка 14 снежня падпісаў закон «Аб зменах Крымінальнага кодэксу», які ўводзіць крымінальную адказнасць за заклікі да санкцыяў адносна Рэспублікі Беларусь, ейных грамадзянаў і арганізацыяў, піша БелТА. Законапраект выносіў на разгляд на даручэнне Лукашэнкі дэпутат Палаты прадстаўнікоў Алег Белаконеў.
Дакладныя фармулёўкі з закону не прыводзяцца, але падчас разгляду законапраекту ў Палаце прадстаўнікоў паведамлялася, што ён уносіць змены ў арт. 361 КК РБ («Заклікі да дзеянняў на шкоду нацыянальнай бяспецы»).
Як і прапаноўвалася ў законапраекце, пакаранні прадугледжаныя такія:
- да 6 гадоў пазбаўлення волі – калі заклікі адрасаваныя шараговым асобам;
- да 10 гадоў – калі да іншых дзяржаваў, міжнародных і замежных арганізацыяў;
- да 12 гадоў – калі заклікі паходзяць ад службовай асобы з выкарыстаннем службовых паўнамоцтваў або калі «прывялі да цяжкіх наступстваў, напрыклад, абмежавання гандлю, уключэння прадпрыемстваў у санкцыйны спіс».
БелТА падкрэслівае, што гэткія пакаранні – «адэкватны адказ на спробы нанесці шкоду нацыянальнай бяспецы з боку дэструктыўных сілаў».
Раней мноства дэпутатаў, чыноўнікаў і дзяржаўных службоўцаў (дэпутат Алег Гайдукевіч, старшыня Еўразійскай эканамічнай камісіі Міхаіл Мясніковіч і іншыя) выказваліся аб тым, што санкцыі толькі «зробяць краіну мацнейшай», «створаць умовы для пад’ёму эканомікі» і дадуць «новыя магчымасці». Ці закранае іх цяпер крымінальны артыкул, невядома.
АА belsat.eu
