Раней пра намер з наступнага года канфіскоўваць і перадаваць ва Украіну зарэгістраваныя ў Расеі аўтамабілі паведаміла Латвія. Тое самае збіраецца рабіць і Літва з сярэдзіны сакавіка 2024 года, піша «Delfi» са спасылкай на тэлеканал LNK.
З 11 верасня Літва не ўпускае ў краіну аўтамабіляў, зарэгістраваных у РФ.
«За першы тыдзень верасня мы налічылі 58 аўтамабіляў з расейскімі нумарамі, за другі – 70, а цяпер ці ніводнага, ці 1-3 на дзень трапляюцца», – кажа прадстаўніца Мытнага дэпартаменту Літвы Ірміна Фралова-Мілашыене.
Зарэгістраваныя ў РФ аўтамабілі не ўпускаюць таксама Літва, Польшча, Фінляндыя, Латвія і Эстонія. Латвія абвесціла пра намер канфіскоўваць такія аўтамабілі да 1 лютага 2024 года і перадаваць іх грамадзянам Украіны. Такое ж рашэнне прыняла і Літва.
«Ім дадзены пераходны перыяд да 11 сакавіка, яны могуць вывезці гэтыя аўтамабілі. Калі яны гэтага не зробяць, аўтамабілі канфіскуюць. Ці суправодзяць да мяжы, каб іх маглі вывезці», – сказаў кіраўнік Камітэту нацыянальнай бяспекі і абароны Лаўрынас Касчунас.
Такія рашэнні Латвія і Літва прынялі на падставе рэкамендацыяў Еўракамісіі. У той жа час Еўрапарламент зазначаў, што краіны Еўразвязу павінны спыніць канфіскацыю аўтамабіляў з расейскімі нумарамі, бо гэта дыскрэдытуе санкцыі. Дэпутат Еўрапарламенту Андрус Кубілюс заяўляў, што ЕЗ павінен прыняць больш жорсткія захады, чым санкцыі ў дачыненні да касметыкі ці аўтамабіляў. Ён лічыць, што пад санкцыйныя абмежаванні мусяць трапіць «Росатом», расейскія ўгнаенні, іншыя энергарэсурсы, якія Расея экспартуе.
Касчунас жа не лічыць канфіскацыі аўтамабіляў дробяззю.
«Лёгка сядзець на канапе і казаць, што я не ваюю, ваюе хтосьці іншы. Але калі цябе просяць зрабіць штосьці, каб вайна скончылася – не, я лепш паеду ў Еўропу, павандрую. Не, такога не будзе. Я лічу, што аўтамабілі трэба канфіскоўваць. А потым аддаваць украінцам», – сказаў ён.
Літва свайго рашэння змяняць не будзе, зазначыў кіраўнік МЗС Літвы Габрыелюс Ландсбергіс.
Еўракамісія яшчэ ў верасні пастанавіла забараніць увоз у Еўразвяз шэрагу рэчаў з Расеі: пад забарону могуць трапіць нават асабістыя аўтамабілі, лічбавая тэхніка накшталт ноўтбукаў і тэлефонаў, касметыка, валізы, каштоўныя камяні і іншае. Як дакладна рэалізоўваць гэтыя санкцыі, кожная краіна мусіць вызначыць сама. Польшча, краіны Балтыі і некаторыя іншыя краіны пастанавілі, што забароняць уезд аўтаў на расейскіх нумарах. Гэтак, з 2 кастрычніка ўезд аўтамабіляў з расейскай рэгістрацыяй забараніла Балгарыя.
Пра выпадкі канфіскацыі аўтамабіляў з расейскімі нумарамі ўлетку 2023 года паведамлялі расейцы, якія былі ў Нямеччыне.
Марыя Міхалевіч belsat.eu