Літоўская паліцыя пацвердзіла, што раніцай 13 кастрычніка ў школы і садкі краіны пачалі прыходзіць лісты з пагрозамі выбухаў. Пра гэта піша выданне «Delfi».
«З 6-й гадзіны раніцы паступіла 140 лістоў на расейскай мове з пагрозамі падарваць школы і дзіцячыя садкі ў розных гарадах краіны», – заявіў прадстаўнік Дэпартаменту паліцыі Рамунас Матоніс.
Пазней ён удакладніў, што такіх лістоў было атрымана больш за 300.
Дзень таму ў Клайпедзе 18 школаў атрымалі паведамленні пра закладзеную выбухоўку, але спецыялісты не выявілі выбуховых рэчываў.
Прадстаўнік Дэпартаменту паліцыі Літвы паведаміў, што ў пятніцу 13 кастрычніка быў узмоцнены нагляд аб’ектаў габрэйскай супольнасці краіны.
«Асноўная ўвага надаецца абʼектам, дзе будуць людзі, але пры гэтым наглядацца будуць і такія абʼекты, як сінагогі, мемарыялы, могілкі», – растлумачыў прадстаўнік паліцыі.
На абʼектах, звязаных з габрэйскай супольнасцю Літвы, інцыдэнтаў не было.
Паводле звестак перапісу насельніцтва Літвы, у 2011 годзе ў краіне жылі крыху больш за 3000 габрэяў.
Зміцер Міраш belsat.eu
