Скардзяцца ў Генеральную асамблею той самай ААН, у якой адмысловая група з ухвалення Рады па правах чалавека расследуе гвалт пасля выбараў у Беларусі.
Намеснік старшыні Савету Рэспублікі Анатоль Ісачанка выслаў на адрас Генеральнай Асамблеі Арганізацыі аб’яднаных нацыяў заяву адносна «эканамічнага і палітычнага ціску на Беларусь», піша БелТА.
Ісачанка – нацыянальны каардынатар у дасягненні Мэтаў устойлівага развіцця (праграмы Генасамблеі ААН). Ён заявіў, што Беларусь выконвае свае абавязкі ў рэалізацыі Мэтаў, што ў дзейнасць уцягнутыя як дзяржава, так і грамадзянская супольнасць, што рэспубліка мае істотны прагрэс у дасягненні Мэтаў.
Ён, згадаўшы страты ў Другой сусветнай вайне, заявіў, што Беларусь прытрымліваецца палітыкі неўмяшальніцтва ва ўнутраныя справы іншых дзяржаваў. А Злучаныя Штаты і краіны Еўразвязу вядуць «мэтанакіраваную кампанію палітычнага і эканамічнага ціску», таму дасягненне Мэтаў пад пагрозай.
«Аднабаковыя абмежавальныя меры ў выглядзе недапушчэння вырабленых у Беларусі тавараў на еўрапейскі рынак, забароны заходніх дзяржаваў на пералёты беларускіх перавознікаў над сваёй тэрыторыяй, эскалацыя міграцыйнага крызісу на беларуска-літоўскай мяжы ў цяперашні час набываюць катастрафічныя перспектывы», – заяўляе Ісачанка.
Паводле яго, умяшальніцтва ў беларускія справы парушае Дэкларацыю прынцыпаў міжнароднага права, а ўжываць санкцыі «не можа ніводная дзяржава». Ён таксама наракаў, што «сотні зваротаў працоўных калектываў» супраць санкцыяў ігнаруюцца Еўразвязам.
Рада ААН па правах чалавека ў сакавіку ўхваліла стварэнне групы ў расследаванні падзеяў у Беларусі пасля выбараў 2020 года, жорсткага здушэння мірных пратэстаў. Яшчэ ў мінулым верасні ААН мела звесткі пра амаль паўтысячы дакументальна зафіксаваных выпадкаў катаванняў і жорсткага абыходжання з людзьмі ў Беларусі, а беларускія праваабаронцы потым прысылалі і новыя звесткі. Катаванні ў Беларусі расследуе таксама АБСЕ.
АА belsat.eu
