«Роў, насып, жалезабетонны плот з калючым дротам». Украіна будуе сцяну на мяжы з Беларуссю
Намеснік кіраўніка Офісу прэзідэнта Украіны Кірыл Цімашэнка паведаміў у сваім Telegram-канале, што ў Валынскай, Жытомірскай і Роўненскай вобласцях украінцы будуюць сцяну на мяжы з Беларуссю.
«Роў, насып, жалезабетонны плот з калючым дротам – гэта інжынерныя загароды, якія будуюць на Валыні. Такім чынам ужо забудаваныя каля 3 км мяжы, работы працягваюцца. Гэта яшчэ не ўсё, але падрабязнасцяў раскрываць не будзем», – паведаміў Цімашэнка.
Паводле намесніка кіраўніка Офісу прэзідэнта, аналагічныя працы вядуцца на Жытоміршчыне і ў Роўненскай вобласці. Фартыфікацыйныя збудаванні таксама ствараюць у рэгіёнах, што мяжуюць з Расеяй.
Цімашэнка падкрэсліў, што ўкраінскія памежнікі «маюць усё неабходнае абсталяванне для таго, каб убачыць ворага далёка ў тыле».
«Важна, што над уладкаваннем мяжы сістэмна працуе абласная ўлада і мясцовы бізнес. Мы ўсе жадаем абароны, мы робім усё, каб спыніць нават гіпатэтычнае пасоўванне ворага», – дадаў ён.
Нагадаем, рэжым Аляксандра Лукашэнка выступае хаўруснікам пуцінскай агрэсіі супраць Украіны. Цягам васьмі месяцаў Расея выкарыстоўвае беларускую тэрыторыю і паветраную прастору для бамбавання Украіны, а ў лютым–сакавіку адсюль разгортваўся наземны наступ расейскіх войскаў на Кіеў. Таксама беларускі бок перадае расейцам бранятэхніку і боепрыпасы.
Новая фаза эскалацыі пачалася 10 кастрычніка: у гэты дзень на нарадзе з сілавікамі Лукашэнка заявіў, што Украіна нібыта плануе нанесці ўдар па тэрыторыі Беларусі і паведаміў пра рашэнне разгарнуць сумесную расейска-беларускую групоўку войскаў. Эшалоны з расейскімі вайскоўцамі пачалі прыбываць у Беларусь 15 кастрычніка. Афіцыйна заяўлена, з Расеі ў межах разгортвання рэгіянальнай групоўкі войскаў прыбудуць 9 тысяч жаўнераў, 170 танкаў, да 200 бронемашынаў і каля 100 гарматаў і мінамётаў. Пры гэтым у Менску не выключаюць, што склад расейскай групоўкі можа быць скарэктаваны.
У канцы кастрычніка начальнік Галоўнага ўпраўлення выведкі Мінабароны Украіны Кірыл Буданаў заявіў, што расейская групоўка ў Херсоне пасля адступлення можа быць часткова перакінутая ў Беларусь. Паводле Буданава, гэта павялічыць пагрозу ўдару з беларускай тэрыторыі па Заходняй Украіне.
Глеб Нержын belsat.eu
