У рубрыцы «Ведай свае правы» праграмы «Маю права» юрыст Міхаіл Кірылюк, адказны за пытанні юстыцыі НАУ, распавёў, чым пагражае суддзям і сведкам удзел у закрытых судах.
Законнасць закрытага суда залежыць ад мэты. Суд павінен быць закрыты, каб не распаўсюджваць інфармацыі аб прыватным жыцці, прыватнай інфармацыі, якая можа пашкодзіць ахвяры. Самы просты прыклад – справы ў злачынствах супраць палавой свабоды, справы, дзе ахвяра – непаўналетні.
«Напэўна, самая верагодная мэта, з якой такія працэсы робяцца закрытымі, – каб не даць распаўсюдзіць інфармацыі аб сфальсіфікаваных доказах, каб зрабіць выкрыванне гэтых фальсіфікацыяў найбольш цяжкім», – мяркуе Міхаіл Кірылюк.
Ананімнасць сведкі апраўданая, калі ёсць нейкая арганізаваная злачынная група, мафія, якая можа пагражаць жыццю і здароўю сведкі.
На думку Міхаіла Кірылюка, у выпадку, калі сведкам выступае супрацоўнік міліцыі, вельмі цяжка ўявіць, каб у цяперашніх беларускіх рэаліях яму магло нешта пагражаць. Для юрыста гэта выглядае так: людзі разумеюць, што яны даюць фальшывыя доказы, фальшывыя паказанні, і таму не жадаюць раскрываць свайго імя і прозвішча, каб потым пазбегнуць адказнасці.
Ананімныя сведкі парушаюць Крымінальны кодэкс. Ёсць адказнасць за заведама ілжывае сведчанне ў судзе. Такія сведкі могуць атрымаць да 3 або да 5 гадоў пазбаўлення свабоды.
Найбольш верагодна, гэта робіцца, каб перашкодзіць незаконна асуджанай ахвяры камунікаваць са сваім адвакатам. «Іншых прычынаў для таго, каб гэта рабіць, мы не бачым», – кажа Міхаіл Кірылюк.
Cуддзя, якія выносіць вырак заведама нявіннай асобе, можа быць пакараны нават 10 гадамі пазбаўлення свабоды.
Існуе артыкул 128 «Катаванні», які прадугледжвае пакаранне да пажыццёвага пазбаўлення свабоды і да смяротнай кары.
Міхаіл Кірылюк звяртае ўвагу на тое, што пра катаванні палітвязняў у беларускіх турмах стала вядома ўжо ў першыя дні жніўня. «Цяпер немагчыма камусьці з суддзяў, якія выносілі выракі ўжо ў наступныя дні, сказаць, што ён не ведаў, што ў выніку ягонага прысуду чалавека ў турме, палітычнага зняволенага могуць катаваць. І гэта ўсё таксама дадае адказнасці», – кажа юрыст.
«Калі ўлада мяняецца, калі гэтых людзей саджаюць адзін насупраць другога, то яны пачынаюць даваць паказанні, бо яны разумеюць, што ім больш нічога не застаецца. Вось і ўсё, – тлумачыць Міхаіл Кірылюк. – І гэта будзе таксама вялікая-вялікая крыніца доказаў. Бо вядома, хто там працаваў, вядома, хто быў на якіх зменах, і ўсіх іх можна будзе расшукаць і дапытаць».
Праваабарончую праграму «Маю права» глядзіце кожную пятніцу а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.