Улады самаабвешчанай Прыднястроўскай Малдаўскай Рэспублікі (ПМР) просяць Расею павялічыць колькасць міратворцаў. Пра гэта заявіў «РИА Новости» кіраўнік прадстаўніцтва ПМР у РФ Леанід Манакоў.
Паводле Манакова, цяпер колькасць расейскіх міратворцаў не большая за 450 асобаў, якія стала дзеюць у зоне бяспекі. Хоць нібыта дакументы дазваляюць павялічыць яе да 3100 асобаў. То бок прапануецца рост у 7 разоў.
«Такая опцыя ёсць, і яна апраўданая з пункту гледжання пагаршэння рызык бяспекі, у тым ліку тэрарыстычнай пагрозы, і пры гэтым юрыдычна абгрунтаваная дакументамі», – сказаў Леанід Манакоў.
Кіраўнік прадстаўніцтва ПМР у РФ адзначыў, што міратворчыя сілы можна павялічыць у тым ліку за кошт расейцаў, якія жывуць у ПМР.
22 красавіка 2022 года намеснік камандуючага войскамі Цэнтральнай вайсковай акругі РФ Рустам Мінекаеў увогуле сказаў, што расейская армія мусіць займець кантроль над поўднем Украіны і выйсці да сепаратысцкага рэгіёну Малдовы – Прыднястроўя, «дзе таксама адзначаюцца факты прыгнёту расейскамоўнага насельніцтва». Прыднястроўе было і на мапах акупацыі Украіны, якія паказваў Аляксандр Лукашэнка.
Намеснік генеральнага сакратара NATO Мірча Джоанэ 13 лютага 2023 года заявіў, што Расея мае план «пры дапамозе Прыднястроўя аблажыць Украіну ззаду і затым захапіць Адэсу». Аднак Малдове не варта баяцца, бо рыторыка Расеі «ідзе ад слабасці, а не ад сілы».
Паведамленні пра план Расеі ўчыніць пераварот у Малдове выклікаюць «глыбокую занепакоенасць» і ў ЗША.
Украінскі вайсковы аглядальнік Аляксандр Каваленка адзначыў, што Расея можа сфармаваць у Прыднястроўі 11 батальённа-тактычных групаў агульнаю колькасцю больш за 9000 асобаў. Якія, праўда, не маюць тэхнікі паводле штатнай камплектацыі, а тая, што ёсць, «не ўся баяздольная і пераважна ў не прыдатным для выкарыстання стане».
Для Украіны, са словаў Каваленкі, пакуль пагроза з боку Прыднястроўя мінімальная, але «гэтая група войскаў стварае сур’ёзную пагрозу Малдове». Расейскія войскі з Прыднястроўя могуць без праблемаў захапіць аэрадром «Мэркулешці», адрэзаць паўночную Малдову ад цэнтру і ўдарыць па Кішынэве.
Якуб Хруст belsat.eu
