Савет Федэрацыі прызначыў чарговыя прэзідэнцкія выбары ў Расеі на 17 сакавіка 2024 года.
Спікерка верхняй палаты расейскага парламенту Валянціна Матвіенка заявіла, што гэтым рашэннем «па сутнасці даецца старт перадвыбарнай кампаніі». Яна падкрэсліла, што ў выбарах будуць таксама браць удзел жыхары анексаваных тэрыторыяў Данецкай, Луганскай, Херсонскай і Запарожскай вобласцяў Украіны, што стане для іх «кульмінацыяй уз’яднання».
Уладзімір Пуцін пакуль афіцыйна не абвяшчаў пра ўдзел у выбарах 2024 года. Раней у інтэрв’ю выданню «The New York Times» прэс-сакратар прэзідэнта РФ Дзмітрый Пяскоў заявіў, што на прэзідэнцкіх выбарах 2024 года ў Расеі пераабранне Пуціна непазбежнае: за яго прагаласуюць больш за 90 % выбарнікаў.
У жніўні выданне «Медуза» распавядала, што ў палітычным блоку Адміністрацыі прэзідэнта Расейскай Федэрацыі (АП) ужо вызначыліся са спарынг-партнёрамі, якія будуць «канкураваць» з Пуціным на прэзідэнцкіх выбарах. Адным з галоўных крытэраў адбору стаўся ўзрост: сярод зарэгістраваных кандыдатаў не павінна быць палітыкаў, маладзейшых за 50 гадоў, каб Пуцін не выглядаў старым. Паводле выдання, папярэдне ў АП разлічвалі, што на выбары, акрамя Пуціна, пойдуць прадстаўнікі трох парламенцкіх партыяў: КПРФ (Генадзій Зюганаў), ЛДПР (Леанід Слуцкі) і «Новые люди» (Аляксей Нячаеў).
У лістападзе пра свой намер балатавацца на прэзідэнцкіх выбарах заявіў былы лідар узброеных фармаванняў «ДНР» Ігар Стралкоў (Гіркін), які цяпер за кратамі.
Глеб Нержын belsat.eu