Кіраўнік Народнага антыкрызіснага ўпраўлення з іроніяй паставіўся да пагрозаў Аляксандра Лукашэнкі ды інфармацыі пра чарговую, ужо сёмую крымінальную справу. Пра свае эмоцыі Павел Латушка распавёў у эфіры тэлеканала «Дождь».
«Лукашэнка зрабіў мой дзень. Я атрымаў столькі пазітыўных каментароў у сацыяльных сетках. Перадусім я маю прапанову ўсе «вісякі» ў Беларусі павесіць на Латушку. Усе нераскрытыя справы варта махам аддаць мне. У нас нядаўна ў Менску на Нямізе мост ноччу рухнуў. Кажуць, што і тут Латушка вінаваты. Ну так, я па гэтым мосце хадзіў, калі акцыі былі», – выказаўся палітык.
Ён падкрэсліў, што падчас пратэсту Лукашэнка выйшаў са зброяй супраць людзей з парасонамі ды на роварах, якія не праяўлялі агрэсіі, а ладзілі мірную акцыю пратэсту супраць фальсіфікацыі выбараў.
Тое, што Лукашэнка назваў яго ворагам, Латушка пракаментаваў так:
«Лукашэнка лічыць ворагамі беларусаў. Для яго, напэўна, я прыярытэтны вораг, калі накіроўвае намаганні супраць мяне і супраць маёй сям’і. Чаму Салаўёву я раптоўна стаў ворагам – гэта пытанне да Салаўёва».
Латушка адзначыў, што гатовы пачуць тлумачэнні Салаўёва і нават падыскутаваў бы з ім пры нагодзе.
Падчас апошняга інтэрвʼю Салаўёву Лукашэнка распавёў пра прызначэнне Паўла Латушкі на пасаду кіраўніка тэатру імя Янкі Купалы. «Калі б я Макея паслухаў, я б яго не прызначаў і правільна паступіў. Але прызначаючы, я яму сказаў: «Ведаеш, Павел, не дай бог ты здрадзіш краіне, добра мне, але калі краіне, я цябе павешу». Ну так, жартам. Ну, а вось здарылася – хутка «перафарбаваўся», «пераабуўся» і павёў сябе такім чынам», – сказаў Лукашэнка.
МГМ belsat.eu
